Israel yohereje Satellite ya mbere mu kirere! Ibyaranze iyi tariki mu mateka y’Isi

Ibintu biba byarabaye kuri iyi tariki mu myaka yashize ni byinshi cyane ariko uyu munsi, InyaRwanda yaguhitiyemo bimwe mu by’ingenzi bidateze kwibagirana mu mateka y’isi.

Bimwe mu byaranze uyu munsi mu mateka:

1180: Mu Bufaransa, Umwami Philippe II yasimbuye ku ngoma Louis VII, wari umaze gutanga.

1551: Havutse Henri III, Umwami w’u Bufaransa.

1946: Sir Winston Leonard Spencer-Churchill wari umenyerewe cyane ku izina rya "Winston Churchill" yasabye ko habaho Itegeko Nshinga rigenga Leta Zunze Ubumwe z’u Burayi. 

Yabaye umusirikare, yarwanye mu Ntambara ya Mbere y’Isi, azwi mu ntambara zo mu Buhinde no muri Sudani. Yabaye kandi umunyapolitiki urangwa n’impinduramatwara. Umushinga we wa Leta Zunze Ubumwe z’u Burayi ntiwahise ugerwaho ariko nyuma y’igihe kirekire haje gushingwa Umuryango w’Ubumwe bw’u Burayi.

1955: Habaye Coup d’Etat muri Argentine, Perezida Juan Peron ahirikwa ku butegetsi n’agatsiko k’ingabo.

1957: Abanyamerika bagerageje bwa mbere igisasu cya kirimbuzi giturikirizwa mu butaka. Byabereye muri Nevada.

1985: Abantu ibihumbi icumi bahitanywe n’umutingito wari ku gipimo cya 8,1.

1988: Israel yohereje Satellite yayo ya mbere mu kirere.

1991: Biélorussie yatangarije Umuryango w’Abibumbye ko izina ryayo ryahindutse Bélarus.

1991: Abashakashatsi b’Abadage bavumbuye umurambo ukigaragaza isura, w’umuntu wari umaze imyaka 5000 apfuye. Ni mu bushakashatsi bakoreraga mu buvumo bunyuranye bwa Autrichia.

2002: Hatabarutse Général Robert Gueï, wabaye Perezida wa Côte d’Ivoire, igihugu yari yaranabereye Umugaba Mukuru w’Ingabo. Yishwe arashwe nyuma y’amezi make hari umwuka mubi hagati ye na Laurent Gbagbo wayoboraga iki gihugu.