Real Madrid yegukanye UEFA Super Cup, Mbappe atangira kubona ibyo yari yarabuze

Umukino wa UEFA Super Cup, wari wahuje Real Madrid yegukanye UEFA Champions League na Atlanta yatwaye Europa League.

Real Madrid itozwa na Carlo Ancelotti, yatwaye UEFA Champions League itsinze Brussia Dortmund ku mukino wa nyuma, naho Atalanta yo ikaba yaratwaye Europa League itsinze Bayer Leverkusen ku mukino wa nyuma.

Abakinnyi Real Madrid ya Carlo Ancelotti yabanje mu kibuga ni Courtois; Carvajal, Rudiger, Militao, Mendy; Valverde, Tchouameni, Bellingham; Rodrygo, Mbappe na Vinicius Junior.

Atlanta ya Gian Pierre Gasperini, yo abakinnyi yabanje mu kibuga ni Musso; Djimsiti, Hien, Kolasinac; Zappacosta, Pasalic, Ederson, Ruggeri; Lookman, De Ketelaere na Retegui.

Real Madrid yakinnye igice cya mbere umutima wavuye mu gitereko kuko Atalanta niyo yakinaga neza mu buryo bwo kwiharira umupira.

Abakinnyi ba Atalanta barimo Lookman na Ruggeri bagerageje uburyo bwo gushaka ibitego, nuko ba myugariro ba Real Madrid bayobowe na Anthony Rudiger baba ibamba.

Ba myugariro ba Atalanta, bagumye kuba maso kuko bari bazi neza ko isaha ku isaha Real Madrid yari kubona igitego kuko yari ifite abakinnyi nka Jude Bellingham, Vinicius Junior na Kylian Mbappe.

Ku munota wa 32, Mbappe yafashe umupira, nyuma yo gucenga abakinnyi batatu ba Atalanta, yageze kuri myugariro Djimsiti, umupira awumukuraho neza.

Ku munota wa 35, Real Madrid yabonye uburyo bwa Jude Bellingham bwari kubyara amahirwe y'igitego, gusa byarangiye akoreye amakosa umuzamu wa Atlanta Juan Musso, nuko Bellingham ahabwa ikarita y'umuhondo.

Ku munota wa 45, na none Vinicius Junior yarase igitego gikomeye cyane, nuko igice cya mbere kirangira amakipe yombi anganya ubusa ku busa.

Mu gice cya kabiri, nabwo Atlanta yagarutse mu isura yo kwataka, na Real Madrid yaje yiminjiyemo agafu.

Vinicius Junior, Mbappe na Jude Bellingham, bagumye gushaka amayeri bakoresha ngo bace mu rihumye ba myugariro ba Atlanta, nabo baguma kuba ibamba.

Real Madrid nk'uko bisanzwe, itangira ikina nabi, igakurira mu mukino. Ku munota wa 59, Jude Bellingham yacenze abakinnyi ba Atlanta, atanga umupira kwa Vinicius Junior nawe arabasubira, ubwo ba myugariro benshi bari biteze ko Vinicius aza gutanga umupira kwa Mbappe, ariko yahise awutanga kwa Federico Valverde, atsindira Real Madrid igitego cya mbere.

Real Madrid ikimara kubona igitego cya mbere, yahise yatakana ishyaka, nuko ku munota wa 68 Kylian Mbappe atsindira Real Madrid igitego cya kabiri, aba atsinze igitego cye cya mbere muri Real Madrid.

Carlo Ancelotti akimara kubona ko yatsinze ibitego bibiri, yatangiye gutanga umwanya ku bakinnyi, aho ku munota wa 76 Rodrygo yahaye umwanya Luka Modric, naho ku munota wa 83, Kylian Mbappe ava mu kibuga, aha umwanya Brahim Diaz.

Ku munota wa 90, abarimo Dani Carvajar, Jude Bellingham na Vinicius Junior, bavuye mu kibuga, basimburwa na Arda Güler, Dani Ceballos na Lucas Vasquez.

Iminota 90 isanzwe yarangiye Real Madrid ifite ibitego bibiri ku busa, umusifuzi yongeraho iminota ibiri. Iyo minota ibiri, yarangiye nta gihindutse, nuko Real Madrid yegukana Super Cup ya Gatandatu.

Iyi Super Cup yabaye amateka akomeye kuri Kylian Mbappe kuko umukino wa mbere yakiniye Real Madrid, yegukanyemo igikombe. Igitego cya kabiri Mbappe yatsinze, cyanabaye amateka mu buzima bwe kuko ni ubwa mbere yatsinze igitego mu mukino wa mbere mu ikipe nshya. 

Kylian Mbappe, umukino wa mbere yakiniye Real Madrid yegukanye igikombe gikomeye 

Real Madrid ikomeje kuba ubukombe ku mugabane w'iburayi 

Ibyo Mbappe yari yarabuze muri Paris Saint-Germain, yatangiye kubibonera muri Real Madrid