Ahabanza Imikino

Amavubi yanze gusuzugurwa na Nigeria imbere ya Perezida Kagame -AMAFOTO+VIDEO

Yanditswe na: Aloys Niyonyungu
Taliki:10/09/2024 12:58 0

Ikipe y'igihugu y'u Rwanda, Amavubi, yihagezeho inganya na Nigeria 0-0 mu mukino wo ku munsi wa 2 wo mu itsinda D mu gushaka itike y'igikombe cya Afurika cya 2025 kizabera muri Morocco. Ni umukino warebwe n'abarimo Perezida Kagame wari uri muri Stade Amahoro.

Kugeza ubu mu itsinda D, Nigeria niyo iyoboye n'amanota 4, u Rwanda rukaba urwa kabiri n'amanota 2, Libya ikaba iya 3 n'inota 1 naho Benin idafite inota na rimwe ikaba iya 4.

UKO UMUKINO WAGENZE UMUNOTA KU MUNOTA

Umukino urangiye ikipe y'igihugu y'u Rwanda, Amavubi, inganyije na Nigeria o-o

90+3' Victor Osmhen abonye umupira ari mu rubuga rw'amahina awushyira ku mutwe ariko Ntwari Fiacre yongera kuba maso.

90+2' Ikipe y'igihugu ya Nigeria ikoze impinduka mu kibuga, Taiwo Awoniyi asimbura Ademola Lookman.

90+1' Amavubi yongeye gukora impinduka mu kibuga, Ruboneka Jean Bosco asimbura Kwizera Jojea.

Umukino wongeweho iminota 5

89' Gitego Arthur asimbuye Nshuti Innocent.

87' Mugisha Bonheur' Casemiro' arekuye ishoti riremereye ari inyuma y'urubuga rw'amahina birangira Stanley Nwabari atabaye umupira awukuramo.

85' Ikipe y'igihugu y'u Rwanda, Amavubi, yongeye guhagurutsa abafana nyuma yo kumarana umupira umwanya Bizimana Djihad ahaye umupira mwiza Kwizera Jojea arekura ishoti gusa birangira rikubise mu maguru ya ba myugariro ba Nigeria.

78' Ba myugariro b'Amavubi bakomeje kwihagararaho aho babujije amahwemo rutahizamu wa Galatasary, Victor Osmhen.

71' Nyuma yo gukora akazi gakomeye, Ntwari Fiacre ahise aryama hasi ari kwitabwaho n'abaganga.

70' Ntwari Fiacre yongeye gutabara Amavubi ku ishoti riremereye ryari rirekuwe na Ademola Lookman.

68' Nigeria ikoze impinduka mu kibuga havamo Willfred Ndindi na Dele Bashiru hajyamo Frank Onyeka na Nwadike Raphael Onyedika.

66' Ikipe y'igihugu y'u Rwanda, irase igitego ku mupira Muhire Kevin ahaye Jojea Kwizera gusa arekuye ishoti rinyura ruguru y'izamu.

Perezida Kagame yaje kureba Amavubi akina na Nigeria

61' Torsten Frank Spitler utoza Amavubi akoze iminduka mu kibuga havamo Mugisha Gilbert hajyamo Samuel Gueulette

60' Ikipe y'igihugu ya Nigeria ikomeze gushaka igitego ariko byanze, uwitwa Ola Aina azamuye umupira mwiza ashaka Ademola Lookman gusa birangira urengeye ku rundi ruhande.

53' Nigeria yongeye kurata uburyo imbere y'izamu, Moses Simon abonye umupira mwiza ari mu rubuga rw'amahina arekura ishoti gusa birangira Ntwari Fiacre atabaye.

51' Ikipe y'igihugu ya Nigeria irase uburyo imbere y'izamu ku mupira Victor Osmhen yahaye Dele Bashilu maze arekura ishoti birangira rinyuze imbere y'izamu.

46' Perezida wa Repubulika y'u Rwanda, Paul Kagame ageze muri Stade Amahoro aho aje kureba uyu mukino. Umukuru w'Igihugu yaherukaga kuri iyi Stade Amahoro ayifungura ku mugaragaro gusa muri rusange akaba yaherukaga kureba umukino w’Ikipe y’Igihugu kuri stade mu 2016 mu mikino y’Igikombe cya Afurika cy’Abakina Imbere mu Gihugu (CHAN) yabereye mu Rwanda.

Igice cya kabiri gitangiye Nigeria ikora impinduka mu kibuga, Moses Simona asimbura Samuel Chukwueze naho Victor Osimhen asimbura Victor Boniface

Igice cya mbere kirangiye amakipe yombi 0-0

45+2' Ola Aina wa Nigeria abonye ikarita y'umuhondo ku ikosa akoreye Niyomugabo Claude

45+1' Amavubi abonye koroneri, Muhire Kevin ayihererekanya na Mugisha Gilbet maze azamura umupira ashaka umutwe wa Nshuti Innocent, gusa birangira umunyezamu wa Nigeria afashe umupira neza.

Igice cya mbere cyongeweho iminota 4

45' Nshuti Innocent abonye umupira mwiza asabwa guhereza Muhire Kevin wari winjiye neza, gusa birangira arekuye ishoti rinyura hejuru y'izamu.

44' Mugisha Bonheur abonye umupira mwiza ari inyuma y'urubuga rw'amahina arekuye ishoti rinyura hejuru y'izamu.

39' Ikipe y'igihugu ya Nigeria irase igitego cyabazwe aho Victor Boniface arekuye ishoti rikubita igiti cy'izamu umupira usanga Ademola Lookman agiye kuwutereka mu izamu Niyomugabo Claude awumura ku kirenge.

37' Mugisha Gilbert ahinduye umupira mwiza mu rubuga rw'amahina ukubita ku maboko ya Dele Bashiru yerekana ko ari penariti, gusa umusifuzi ntiyayitanga.

34' Ikipe y'igihugu y'u Rwanda, yari izamutse neza ku mupira Jojea Kwizera yari ahaye Fitina Ombolenga, ariko birangira Dele Bashiru amukuyeho umupira.

31' Ademola Lookman akomeje kuzonga Amavubi, n'ubu yari abonye umupira imbere y'izamu agiye kuwushyira ku kuguru neza birangira Ntwari Fiacre atabaye.

29' Kapiteni w'Amavubi, Bizimana Djihad ahawe ikarita y'umuhondo ku ikosa akoreye Samuel Chukuwueze.

27' Amavubi ararokotse, Mugisha Gilbert akoze amakosa atakaza umupira ari mu rubuga rw'amahina maze wifatirwa na Wilfred Ndindi arekuye ishoti birangira rishyizwe muri koroneri itagize icyo itanga.

23' Ikipe y'igihugu ya Nigeria yari ifunguye amazamu kuri koroneri yatewe na Ola Aina maze Ademola Lookman ashyiraho umutwe gusa umusifuzi avuga ko habayemo kurarira.

19' Amavubi arase uburyo imbere y'izamu kuri koroneri nziza yari itewe na Muhire Kevin maze Ekong agiye gukuraho umupira ntibyakunda usanga Nshuti Innocent awuburira mu maguru, usanga Mutsinzi Ange agiye kurekura ishoti ba myugariro ba Nigeria baritambika.

15' Ikipe y'igihugu ya Nigeria irase uburyo buremereye imbere y'izamu aho Ademola Lookman azamukanye umupira acenga asigaranye n'umunyezamu birangira Ntwari Fiacre yitwaye neza.

13' Kwizera Jojea akomewe amashyi n'abafana nyuma y'uko acenze Calvin Bassey na Wilfred Ndindi nubwo birangiye umupira bawumwatse agiye kurekura ishoti.

11' Ikipe y'igihugu y'u Rwanda, Amavubi, yihariye umupira aho iwumaranye umunota urenga ihererekanya neza mu kibuga hagati.

8' Amavubi akomeje kugerageza uburyo, Jojea Kwizera arekuye ishoti ari mu kibuga hagati gusa umupira unyura hejuru y'izamu gato cyane.

6' Amavubi abonye koroneri ya mbere iterwa na Muhire Kevin ayihererekanya na Mugisha Gilbert azamura umupira mwiza usanga Mugisha Bonheur ashyiraho umutwe ariko unyura hejuru y'izamu gato cyane.

3' Nigeria irase uburyo bwa mbere imbere y'izamu ry'Amavubi aho Ademola Lookman ahaye umupira mwiza Onyemaechi gusa birangira utagiye ku kirenge neza.

2' Abafaba b'Amavubi batangiranye morale aho ubona ko bafitiye icyizere abakinnyi babo.

1'Umukino utangijwe n'ikipe y'igihugu y'u Rwanda "Amavubi", gusa umupira ugeze kuri Mugisha Gilbert birangira awutakaje.

Abasifuzi bakomoka muri Morocco nibo bagiye gusifura uyu mukino, Karim Sabry uri hagati, Mostafa Akarkad akaab uwa mbere w'igitambaro naho Hamza Nassiri akaba uwa kabiri w'igitambaro.

14:57' Hari kuririmbwa indirimbo y'ubahiriza igihugu cy'u Rwanda

14:56' Hari kuririmbwa indirimbo y'igihugu cya Nigeria

14:55' Amakipe yombi yinjiye mu kibuga mbere y'uko umukino utangira

14:44' Nta bafana benshi bari muri Stade kuko ibihande bimwe birimo ubusa, ni nyuma yuko FERWAFA yatangaje ko kwinjira kuri uyu mukino ahasanzwe ari ubuntu.

14:42' Ikipe y'igihugu ya Nigeria nayo isubiye mu rwambariro nyuma yo kwishyushya.

14:38' Amavubi asubiye mu rwambariro nyuma yo kwishyushya.

Amavubi yishyushya

Kagoma za Nigeria zishyushya

Ubwo abakinnyi ba Nigeria batemberaga mu kibuga mbere y'uko umukino uba

14:22' Abakinnyi b'ikipe y'igihugu ya Nigeria bageze mu kibuga bari kwishyushya

Umutoza w'Amavubi yakoze impinduka imwe ku bakinnyi babanje mu kibuga u Rwanda rukina na Libya aho Mugisha Bonheur yafashe umwanya wa Rubanguka Steve.

Abakinnyi 11 b'Amavubi babanje mu kibuga; Fiacre Ntwari, Fitina Ombolenga, Ange Mutsinzi, Thierry Manzi, Claude Niyomugabo, Mugisha Bonheur, Djihad Bizimana, Jojea Kwizera, Kevin Muhire, Gilbert Mugisha na Innocent Nshuti.

Abakinnyi 11 ba Nigeria babanje mu kibuga; Stanley Nwabali, Ola Aina, Bruno Onyemaechi, William Troost-Ekong, Calvin Bassey, Semi Ajayi, Wilfred Ndidi, Fisayo Dele-Bashiru, Ademola Lookman, Samuel Chukwueze na Victor Boniface.

14:14'Ikipe y'igihugu y'u Rwanda "Amavubi" yinjiye mu kibuga itangiye kwishushya mbere yuko umukino utangira

13:27' Nyuma y'iminota 5 abakinnyi b'Amavubi bazenguruka ikibuga basubiye mu rwambariro

13:22' Abakinnyi b'ikipe y'igihugu y'u Rwanda mu mipira y'ubururu n'umukara bari gutembera mu kibuga mbere yuko baza gucakirana na Nigeria mu mukino uri bukinwe guhera saa cyenda zuzuye

13:20' Nyuma yuko ishyirahamwe ry'umupira w'amaguru mu Rwanda, FERWAFA, ritangaje ko kwinjira kuri uyu mukino ahasanzwe hasi no hejuru ari ubuntu, abafana bari kugenda binjira muri Stade gake gake.

Uyu mukino ni uwa Gatandatu kuva muri 2004 ugiye guhuza aya makipe yombi mu marushanwa yose, Nigeria ikaba yaratsinzemo 2, banganya 3.

Umukino wa mbere wahuje u Rwanda na Nigeria wakinwe ya taliki ya 5 z'ukwezi kwa 6 muri 2004 ukaba wararangiye Nigeria itsinze ibitego 2-0.

Umukino wa kabiri wakiniwe mu Rwanda taliki ya 6 z'ukwezi kwa Gatanu muri 2005 mu gushaka itike y'igikombe cy'Isi, warangiye ari igitego 1-1.

Umukino wa gatatu wahuje aya makipe y'ibihugu byombi nawo wakiniwe mu Rwanda taliki ya 29 z'ukwezi kwa 2 muri 2012 mu gushaka itike y'igikombe cy'Afurika, ukaba wararangiye amakipe yombi anganya 0-0.

Umukino wa kane wakinwe taliki ya 6 z'ukwezi kwa 6 muri 2012 ukaba wari uwo kwishyura mu gushaka itike y'igikombe cy'Afurika. Warangiye Nigeria itsinze u Rwanda ibitego 2-0.

Umukino wa gatanu ari nawo uheruka guhuza aya makipe yombi wakinwe taliki ya 15 z'ukwezi kwa Mbere muri CHAN ukaba wararangiye amakipe yombi anganya 0-0.

Ubwo bivuze ko mu mikino 2 yabereye mu Rwanda, Amavubi yakinnyemo na Kagoma za Nigeria, yarangiye amakipe yombi anganya.

Mu mikino 5 ikipe y'igihugu y'u Rwanda iheruka gukina mu marushanwa yose yatsinzemo 2, inganya 2, itsindwa umwe naho Nigeria yo itsinda 2, inganya 1, itsindwa 2.

Ikipe y'igihugu y'u Rwanda yinjijemo ibitego 4 naho yinjizwa 2 mu gihe Nigeria yo yinjije ibitego 7, yinjizwa 6.

Amavubi agiye gukina uyu mukino nyuma yuko anganyije na Libya nayo bari kumwe mu itsnda D mu gushaka itike y'igikombe cy'Afurika cya 2025 mu gihe Nigeria yo yatsinze Benin nayo bari kumwe mu itsinda ibitego 3-0.

Bamwe mu bakinnyi b'Amavubi bakina uyu mukino bari no mu uheruka wa Nigeria muri CHAN, ni Bizimana Djihad na Manzi Thierry gusa. Icyo gihe uyu Kapiteni w'Amavubi ni nawe wari wabaye umukinnyi w'umukino.