Yampaye ubuzima - Nshimiyimana Canisius yashimiye Mukura amazemo imyaka 26

Kuri uyu Kabiri tariki 6 Kanama 2024, ni bwo umutoza Nshimiyimana Canisius yujuje imyaka 26 ari umukozi wa Mukura Victory Sports ibarizwa mu karere ka Huye. Canisius yageze muri Mukura Victory Sports tariki 6 Kanama 1998 mu ikipe y'abato. 

Mu ntangiriro za 1999 Nshimiyimana Canisius yajyanye n'ikipe y'igihugu y'ingimbi mu mikino ya CECAFA yabereye muri Kenya ndetse iyo mikino irangiye, yagarutse ajya mu ikipe nkuru. 

Uyu mugabo uvuka i Nyabisiga muri Huye yakinaga inyuma iburyo nka Nimero 2, ndetse akaba yarakiniye ikipe ya Mukura Victory Sports, gusa aza guhagarika umupira w'amaguru mu 2010 kubera ikibazo cy'imvune.

Nyuma yaho yahise yinjira mu mwuga w'ubutoza aho yaje kuba umutoza wungirije wa Mukura Victory Sports ndetse aza no gutoza ikipe y'abato ya Mukura mu bihe bitandukanye.

Nshimiyimana Canisius ni umwe mu batoza batanga ikizere mu myaka iri mbere 

Mu kiganiro yagiranye na InyaRwanda, Nshimiyimana Canisius yashimiye ikipe ya Mukura avuga ko yamuhaye umurongo w'ubuzima. Yagize ati: "Mukura yambereye ikipe nziza, yampaye amahirwe, nungukiyemo abavandimwe n'inshuti, muri macye ni ikipe yampaye icyerekezo cy'ubuzima mu mupira."

Nshimiyimana Canisius avuga ko Mukura yayigiriyemo ibihe byiza harimo n'ibyo atazibagirwa. Ati: "Ntabwo nzibagirwa mu 2022 dutsinda amakipe hafi ya yose akomeye mu Rwanda harimo APR FC na Rayon Sports. 

Umukino wa APR FC waranshimishije ubwo nahagarikaga urugendo rw'imikino 50 iyi kipe yari imaze idatsindwa. Ndibuka kandi mu 2000 Mukura isohokera u Rwanda twerekeza muri Ethiopia, icyo gihe na cyo sinakibagirwa."

Canisius ni we wahagaritse urugendo rwa Adil rw'imikino 50 adatsindwa icyo gihe yari umutoza w'agateganyo 

Nshimiyimana Canisius yemeza ko igihe kigeze ngo nawe atangire kuba umutoza mukuru uhoraho. Yagize ati: "Nari maze igihe nta byangombwa binyemerera kuba umutoza mukuru, gusa kuri ubu maze kubibona, bibaye byiza nazatoza ikipe yanjye ya Mukura cyangwa nkaba nashaka indi."

Nshimiyimana Canisius aherutse kubona ibyangombwa by'umutoza byo mu bwoko bwa B, akaba yari amaze iminsi yifuzwa n'ikipe ya Etoile de L'Est ariko we ahitamo kuguma muri Mukura Victory Sports.

Mu 2022 abakunzi ba Mukura bahembye Nshimiyimana Canisius kubera uburyo yakunze ikipe ndetse akaba yarabafashije gutsinda APR FC na Rayon Sports