Uko byifashe mu matora yo muri USA kuva Perezida Biden yahagarika kwiyamamaza

Ibi Biden yabitangaje ku itariki 20 Nyakanga 2024 ubwo yanerekanaga zimwe mu mpamvu zamuteye gufata uyu mwanzuro zirimo n'izijyanye n'ubuzima bwe.

Ibi yabitangaje kandi mu gihe habura ukwezi kumwe gusa ngo habe inama yo kwemeza umukandida uzahagararira Abademokarate mu matora y'Umukuru w'Igihugu.

Nubwo Perezida Biden yemeje ko Madamu Harris amusimbura ku mwanya wo kwiyamamariza ku mwanya w'umukuru w'igihugu ku ruhande rw'Abademokarate', intumwa z'abanyagihugu bo ku nzego zo hasi nizo zigomba guhitamo uwo zishyigikiye.

Icyo bivuze, ni uko Kamala Harris yari mu ruhande rumwe na Joe Biden, kandi kuba yamushyigikiye bishobora gutuma bamuhitamo byoroshye. Nk'uko ikinyamakuru Reuters kibivuga, ishyaka ry'Abademokarate risa nk'aho riri guhuriza kuri Madamu Harris, ibyo bikaba bishobora gutuma nta wundi bashyiraho.

*Ese haba hari abandi bakandida bari kwiyamamariza ku mwanya wa Perezida wa Leta Zunze Ubumwe za Amerika?

Kuva Biden yatangira gusabwa  guhagarika kwiyamamaza hari abashobora kuba abakandida benshi bagaragaye  bashobora kumusimbura.

Guverineri wa Michigan, Gretchen Whitmer, yavugwagaho kuba umukandida, nubwo yari yavuze ko adatekereza ko yakwiyamamaza nubwo Biden yabihagarika kandi ko no kuva mbere atabiteganyaga.

Aho Perezida Biden atangarije ko yakuyemo ake karenge, Gretchen Whitmer yavuze ko azakora ibishoboka byose "mu gutora Abademokarate no guhagarika Donald Trump".

Nabandi bavugwagaho ko bashobora kwiyamamaza barimo Guverineri wa California, Gavin Newsom, Umunyamabanga wa Leta ushinzwe gutwara abantu n'ibintu, Pete Buttigieg na Guverineri wa Pennsylvania, Josh Shapiro.

Biteganijwe ko inama y'abahagarariye abanyamuryango b'Abademokarate izaba tariki 19 Kanama. Baramutse badahuriye ku mukandida umwe mu ishyaka, ibyo bizahita bifungura amayira yo kwiyamamaza kw'abakandida bashya.

Abakandida bakeneye imikono itari munsi y'intumwa 300 kandi zitarenze 50 zituruka muri Leta imwe kugira ngo izina ry'umukandida rigaragare ku rutonde rw'abiyamamaza ku mwanya w'Umukuru w'Igihugu.

Hazobaho icyiciro cya mbere cy'amatora mu ntumwa 3900, zirimo ababonwa nk'abizerwa mu ishyaka ry'Abademokarate.

Niba nta mukandida ubonye amajwi menshi nyuma y'iki cyiciro cya mbere, bazakomeza bajonjore kugeza hatoranijwe umukandida. Kugira ngo umukandida yemezwe guhagararira ishyaka, asabwa kubona amajwi 1.976.

*Umukandida watsinze atora gute uzamwungiriza ?

CNN ivuga ko ibi bikunze kuba inzira yoroshye kuruta guhitamo umukandida uzaba Perezida.Umukandida watoranijwe niwe uhitamo uwo bazokorana bakaziyamamariza hamwe, abandi bakamwemeza.

Niba Madamu Harris ahuhiye mu ngata Perezida  Biden kwiyamamaza nk'umukandida w'Abademokarate, amwe mu mazina anugwanugwa mu boshobora gukorana nk' umwungirije harimo abavuzwe haruguru, nka Bwana Shapiro n'abandi nka Guverineri wa Illinois JB Pritzker na Senateri wa Arizona Mark Kelly.

* Amafaranga bahaye Biden agiye kujya hehe?

Kubera ko Kamala Harris yari mu matora na Perezida Biden, abahanga mu bijyanye n'imari yo kwiyamamaza bavuga ko amadolari agera kuri miliyoni 100 (miliyoni 73 z'amapound) yakusanyijwe  ashobora guhita ashyikirizwa we aramutse abaye umukandida w'Abademokarate.

Dara Lindenbaum, komiseri mu Nteko ishinzwe amatora ku rwego rw'igihugu, yabwiye ikinyamakuru New York Times ati: " Si ikibazo cyo gikomeye kumenya aho amafaranga azajya" yongeraho ati "Ni ibintu bigaragara cyane."

*Magingo aya Kamala Harris ari imbere ya Donald Trump

Ibipimo by’ikusanyabitekerezo byerekeye amatora ateganijwe muri Amerika mu kwezi kwa cumi na kumwe uyu mwaka bigaragaza ko Visi Perezida Kamala Harris ari imbere ya Donald Trump ibice bibiri ku ijana.

Iri kusanyabitekerezo ryakozwe n’Ibiro Ntaramakuru by’Abongereza, Reuters, n’ikigo gikora ubushakashatsi gifite ibiro bikuru i Paris mu Bufaransa cyitwa Ipsos.

Iri kusanyabitekerezo ryakozwe ku wa Mbere no ku wa Kabiri, ryakurikiranye inama rukokoma y’ishyaka ry’Abarepubulikani aho ku wa Kane w’icyumweru gishize Donald Trump yemeye ku mugaragaro kuzarihagararira mu matora y’umukuru w’igihugu.