Divine Nyinawumuntu yaba agiye gutandukana na Label yamufashaga mu muziki?

Mu ijoro ryo ku wa Kabiri tariki ya 16 Nyakanga 2024 ahagana saa Tanu z'ijoro, umunyamakuru Obededomu Frodouard akaba umwanditsi w'ikinyamakuru cya Paradise n'umwe mu bakora ikiganiro cyitwa Holy Room ku Isibo FM ndetse akaba Umuyobozi mukuru wa Trinity For Support irebera inyungu z'umuramyi Divine Nyinawumuntu, nibwo yaciye amarenga ko hashobora kuba hari ibiri kuba hagati y'iyi Label n'uyu muramyi usanzwe abarizwa mu itsinda rya Kingdom of God Ministry.

Yifashishije 'status' ye ya WhatsApp, Obededomu yasangije abamukurikira amashusho y'ibihe bitandukanye byagiye biba hagati ya TFS n'uyu muramyi, yibanda ku yafashwe ku wa 17 Gicurasi 2023, umunsi nyirizina uyu muramyi yasinyaga amasezerano.

Aya mashusho akaba yaraherekejwe n'ubutumwa bugaragaza ibihe byiza bagiranye na Divine Nyinawumuntu ndetse na zimwe mu mbogamizi bagiye bahura na zo mu rugendo rutoroshye banyuranyemo.

Yifashishije ifoto ya Divine yafashwe le 17 Gicurasi 2023, yaragize ati: "Ubanza uyu munsi iyo Divine asabwa gutera agakorasi kamufasha, yari kuririmba ngo nta muntu bitabera ni uko bitinda kuza."

Ubwo butumwa nta wabwibazaho cyane ko yasobanuraga ibyishimo bya Divine. Gusa ariko hari abaguye mu rujijo nyuma yo gutangaza ati "Kugeza ubu nka TFS twanyuzwe n'imyitwarire ya Divine."

Nyuma yo kwandika ubu butumwa, InyaRwanda yaganiriye na Frodouard, abajijwe niba yacaga amarenga yo gutandukana n'uyu muramyi yirinze kubyemeza cyangwa kubihakana.

Yagize ati "Ndumva ntacyo mfite cyo kuvuga gusa mu buzima bibaho guhura, gukorana ndetse no gutandukana."

Yumvikanishije ko nta byinshi yakongeraho, avuga ko ikibaraje inshinga ari ukuba hafi Divine akazatsinda neza ikizamini cya Leta dore ko ari mu mwaka wa 6 w'amashuri yisumbuye.

InyaRwanda ishatse kumenya ukuri kwa nyirubwite, yegereye Divine Nyinawumuntu maze ayitangariza ko amasezerano yari afitanye TFS yarangiye ariko kandi abashimira inkunga yabo ikomeye mu rugendo rwe.

Ati: “Nibyo Koko Ndashimira Trinity for Support. Ni label yamfashije kuva natangira urugendo rwajye rwa muzika. Bamfashije buri cyose kandi n'ubu baracyamfasha. Twari twasinyanye amasezerano y'umwaka umwe yarangiye tariki 17 Mata 2024 gusa nabwo bakomeje kumufasha kuko nibo banshyigikiye mu gitaramo nakoze Cyabereye mu kigo cy'amashuli cya Camp Kigali.”

Yakomeje ashimangira ko nyuma yo gusoza amasezerano bari bafitanye byose bishoboka, kuko hari n’abandi benshi bakomeje kumwegera bifuza gukorana na we.

Ati: “Umuyobozi wa TFS yaranyegereye ambwirako ninsoza ikizami cya leta dushobora gusinyana andi masezerano. Gusa siwe wenyine kuko abakomeje kunsaba ko dukorana ni benshi.

Ashimangira amakuru y’uko Claude uzwi nka Papa Surprise yamuvugishije, Divine yagize ati: “Gusa hari umugabo witwa Claude(Papa Surprise) ufite label nshya benshi bamuzi ategura irushanwa rya Gospel ryitwaga Rwanda Gospel Stars live ashaka ko mubera Bland Ambassador wa label ye kandi numvise afite imishinga myiza kuko label ye ayifatanyije n'umu-Diaspora.

Bampamagaye kenshi bansaba ko dukorana mbabwira ko tuzabiganira nsoje ikizamini cya Leta. Gusa ntacyo nakora batabanje kuganira na Trinity for Support. Ubu ndi nk’umukinnyi w'umupira w'amaguru wasoje amasezerano kandi aba ashobora kuganira n’amakipe menshi ariko ingenzi cyane ari ikipe yakinagamo. Rero babe bandetse ubu umutima uri ku kizamini cya Leta ubwo ibindi bizamenyekana nyuma.”

Uyu muhanzikazi Divine Nyinawumuntu ni umwe mu bahanzi bakomeje kugaragaza impano ikomeye mu kuririmba indirimbo zo kuramya no guhimbaza Imana. Yamenyekanye cyane mu ndirimbo zirimo 'Urugendo,' 'Irembo' n'izindi.

Divine Nyinawumuntu yahamije amakuru y'uko ashobora kwerekeza muri Label nshya

Uyu muramyi yatangaje ko amasezerano yari afitanye na TFS yamaze kurangira
Ashobora kwinjira muri label nshya ihuriyemo Claude ndetse n'umu-Diaspora 

">Kanda hano urebe indirimbo Divine Nyinawumuntu yise "Irembo"