Intsinzi ntibayirebaga ahubwo barayirwaniye - Perezida Kagame avuga ku rugamba rwo Kubohora Igihugu

Perezida Kagame akaba n’Umukandida wa FPR-Inkotanyi ku mwanya w'Umukuru w'Igihugu mu matora ateganyijwe tariki 15 Nyakanga 2024, yaganiriye n’abanyamakuru n’abakoresha imbuga nkoranyambaga mu kiganiro cyabereye ku Mulindi w’Intwari i Byumba.

Mbere y’uko bagirana ibi biganiro, basuye Ingoro y’Amateka y’Urugamba rwo kubohora Igihugu iherereye ku Mulindi wa Byumba, aho bari gusobanurirwa n’Umunyamabanga wa Leta ushinzwe Ubutwererane bw’Akarere, Gen (Rtd) James Kabarebe, ibyaranze uru rugamba. 

Ubwo yabatemberezaga, Gen (Rtd) Kabarebe yeretse abanyamakuru n'abakoresha imbuga nkoranyambaga, inyubako yaberagamo Inama ya Biro Politiki ya FPR-Inkotanyi mu gihe cy'Urugamba rwo kubohora Igihugu no guhagarika Jenoside yakorewe Abatutsi.

Gen (Rtd) Kabarebe yabasobanuriye ko uwari Umugaba w’Ingabo za RPF Inkotanyi, Paul Kagame, yagobotse urugamba nyuma y’uko abari abayobozi mu ngabo biciwe mu Burasirazuba, abasigaye bagatatana. 

Yavuze ko akimara kuhagera Inkotanyi zatangiye kurwana mu buryo bwa kinyeshyamba ari nabwo zahisemo kwerekeza ibikorwa bya gisirikare mu Majyaruguru y’Igihugu.

Perezida Kagame yagaragaje ko Urugamba rwo Kubohora Igihugu rutari rworoshye nk'uko babitekerezaga ku ikubitiro.

Ati “Kuva mu ntangiriro ubwo urugamba [rwo kubohora Igihugu] rwatangiraga, twumvaga uburemere bw’ibyo tugomba kwikorera mu gukora ibyo tugomba gukora no kugera ku byo twatekerezaga. Byaje no gukomera kurushaho uko twabitekerezaga ariko twari duhari kandi twagombaga guhangana na byo uko byari bimeze.’’

Yakomeje avuga ko mbere yo gufata ku Mulindi wa Byumba, FPR yari ifite ibyicaro mu Bubiligi, Kampala n'ahandi hatandukanye. Ati “Ubwo twafataga aka gace twashoboye guhuriza hamwe RPA na RPF, hahinduka icyicaro gikuru cyacu.''

Ubwo Perezida Kagame yasubizaga ikibazo cy’umwe mu banyamakuru kigaruka ku mpamvu Inkotanyi zari zizeye gutsinda ubutegetsi bwari bukomeye ndetse bwari bushyigikiwe n'amahanga bwa Habyarimana, yagize ati: "Ndakubwiza ukuri ntabwo ari siyansi ngo muri siyansi nararebaga nkasanga turi butsinde. Nta kintu cyari gihari cyatwemezaga ko turi butsinde kirenze umutima wacu, kuvuga ngo 'natsinda ntatsinda, ngomba kurwanira ukuri kwanjye'."

Yagaragaje ko icyahesheje FPR-Inkotanyi intsinzi ari umutima wo guharanira ukuri, aho yagize ati: "Ntihazagire ukubeshya ngo ibyo twita intsinzi, ngo barayirebaga. Oya, barayirwaniriye bayigeraho ariko kuba warayirebaga iza, ibyo bizavugwa n’utari uhari.''

Ashingiye ku miterere y'urugamba rwo kwibohora, yagaragaje ko na Leta yariho yumvaga byoroshye kurutsinda.

Yagize ati: "Babaga bazi ngo ni Leta, bafite ibyangombwa byose, twebwe bitaga Inyenzi bazatunyura hejuru bakagenda.''

Perezida Kagame yabwiye uru rubyiruko ko rukwiye kuzirikana ko ibyiza u Rwanda rufite none rutabihoranye, rukamenya amateka.

Yakomeje abasaba kwibaza uko u Rwanda rwageze ku byiza rufite uyu munsi no guharanira kubisigasira binyuze mu gukoresha ijwi bafite neza basobanurira abashaka gupfobya ibyagezweho.

Ati "Mukamenya ngo ibi byiza ntabwo ari uku byari bimeze mu myaka 30 ishize."

Yakomeje agira ati "Ntabwo ibyiza byikora. Ntabwo biva mu bitekerezo gusa, no mu bitekerezo hari intambara. Buri munsi mubyuka mwiteguye intambara. Numvuga nabi, niyo waba utavuze igihugu nabi turahangana."

Perezida Kagame yasobanuye ko ubwo yabwiraga abanyarwanda kuba Intare ntibabe imbwa, yababwiraga kwitegura guhangana n'ikibazo cyaba icy'umuntu ku giti cye, icy'umuryango ndetse n'ik'igihugu muri rusange.

Yaganiriye n'abanyamakuru ndetse n'urubyiruko rukoresha imbuga nkoranyambaga, mbere gato yo kugera kuri Sitade ya Gicumbi, aho agiye kwiyamamariza kongera kuyobora u Rwanda muri manda y'imyaka 5 iri imbere.

Perezida Kagame yagiranye ikiganiro n'abanyamakuru ndetse n'urubyiruko rukoresha imbuga nkoranyambaga ku rugamba rwo kubohora igihugu

Perezida Kagame yagaragaje ko rwari urugamba rutoroshye

Madamu Jeanette Kagame yitabiriye ikiganiro Perezida Kagame yagiranye n'abanyamakuru n'abakoresha imbuga nkoranyambaga

Miss Nishimwe Naomie ni umwe mu babajije ibibazo Perezida Kagame

Uru rubyiruko rwagaragaje ko rwishimiye guhura na Nyakubahwa Perezida Kagame, bafata n'amafoto y'urwibutso

   
Karegeya afatana ifoto y'urwibutso na Perezida Kagame

Scovia Mutesi na Madamu Jeanette Kagame