Amb Olivier Nduhungirehe yashimiye Perezida Kagame ku nshingano nshya yahawe

Ku mugoroba wo kuri uyu wa 12 Kamena, nibwo hasohotse itangazo rihindurira inshingano abayobozi muri Goverinoma hanyuma Amb Olivier Nduhungirehe agirwa Minisitiri w’Ububanyi n’Amahanga n’Ubutwererane(MINAFFET).

Amb Nduhungirehe yahawe izi nshingano zo kuba Minisitiri w’Ububanyi n’Amahanga n’Ubutwererane, yasimbuye Dr.Vincent Biruta wari ugiye kumara hafi imyaka itanu ari muri izi nshingano mu gihe we yahise agirwa Minisitiri w’Umutekano.

Amb Olivier Nduhungirehe yari asanzwe ari Ambasaderi w’u Rwanda mu Buholandi kuva mu mwaka wa 2020 icyo gihe n'ubundi yari avuye ku mwanya wa Minisitiri w’Ububanyi n’Amahanga.

Amb Olivier Nduhungirehe ni umwe mu bayobozi batajya baripfana dore ko mu minsi ishize yanenze ku karubanda ikinyamakuru NRC cyo mu Buholandi nyuma y’uko kigerageje kweza Abanyarwanda bahamijwe n’abakekwaho uruhare muri Jenoside yakorewe Abatutsi mu 1994.

Amb Olivier Nduhungirehe kandi ni umwe mu bafashe iya mbere bamagana ibinyamakuru biharabika u Rwanda ko rubangamira ubwisanzure  bw’itangazamakuru aho ibyo binyamakuru biba byitwaje izindi nyungu.

Nyuma yo guhabwa izi nshingano nshya, Amb Olivier Nduhungirehe yashimiye Perezida wa Repeburika wamuhaye inshingano nshya ndetse anashimira Dr. Vincent Biruta yasimbuye kuri uyu mwanya.

Amb Olivier Ruhungirehe yagize ati “Mfashe uyu mwanya ngo nshimire Nyakubahwa Perezida wa Repubulika Paul Kagame ku cyizere yangiriye angira Minisitiri w'Ububanyi n'Amahanga n'Ubutwererane. Mwijeje kuzakoresha uburambe mfite mu bubanyi n'amahanga no muri politiki, ndetse n'imbaraga zanjye zose mu guteza imbere umubano mwiza w'u Rwanda n'amahanga, nshingiye kuri byinshi byiza byagezweho na Nyakubahwa Minisitiri Vincent Biruta, ndetse n'umuryango wacu wa MINAFFET.”

Dr. Vincent Biruta wari usanzwe ari Minisitiri w'Ububanyi n'Amahanga n'Ubutwererane yagizwe Minisitiri w'Umutekano mu gihugu.