Inganzo ifutse ya Jeanne Dufashwanayo, umuganga w'umuramyi wigira byinshi kuri Vumiliya-VIDEO

Jeanne Dufashwanayo avura abantu indwara z'umubiri na cyane ko ari umuganga w'umwuga, akanahumuriza imitima ya benshi akoresheje ijambo ry'Imana mu buryo bw'indirimbo zisingiza Imana. Ni mushya mu muziki wo kuramya Imana dore ko yatangiye gushyira hanze indirimbo ze bwite mu mwaka wa 2021.

Atuye mu Karere ka Nyabihu ku bw'inshingano. Mu buzima busanzwe akora kwa muganga mu kigo nderabuzima kimwe mu byo mu Karere ka Nyabihu, muri serivisi yo gupima ibizamini (Laboratoire). Ati "Kuririmba nabitangiye kera ariko gukora indirimbo muri studio byatangiye mu 2021. Kugeza ubu mfite Audio (lyrics) 10 na Video ebyiri".

Mu kiganiro na inyaRwanda, Jeanne Dufashwanayo yavuze ko indirimbo ye nshya yitwa "Ni kenshi" irimo ubutumwa bw'uko ari kenshi "nagiye nihakana Kristo mu bikorwa no mu byo navugaga ariko ko ubungubu ngarutse kugira ngo ngirwe mushya".

Avuga ko ari "ubutumwa bwo kwihana no kugarukira Imana. N'undi waba yatsinzwe na we ibasha kumufasha kugarukira Imana". Yavuze ko "abahanzi mfatiraho urugero ni bamwe na bamwe, ariko umwe muri bo ni Vumiliya Mfitimana". Abandi ni nka Yvonne Uwase, Phanuel Bigirimana, Mammi Espé na Liliane Kabaganza.

Vumilia Mfitimana ufatirwaho icyitegererezo na Jeanne Dufashwanayo, ni umuhanzikazi ukunzwe cyane by'umwihariko mu Badivantiste b'Umunsi wa Karindwi abarizwamo. Akunzwe mu ndirimbo "Nyigisha" imaze kurebwa na Miliyoni 1.3 kuri Youtube, "Amahoro", "Bya bindi", "Na nubu", "Ibaga nta kinya" n'izindi zatumbagije izina rye.

Jeanne Dufashwanayo yerekanye ko inganzo ye ifutse ugendeye ku butumwa butinywa na benshi ari kubwira abatuye Isi nk'umwihariko we. Benshi mu baramyi n'abavugabutumwa usanga babwiriza gusa ku mashimwe n'ibitangaza ariko bagatinya kuvuga ububi bw'icyaha. Jeanne we yikije ku butumwa bwo kwihana no kugarukira Imana.

Jeanne Dufashwanayo amaze imyaka 3 mu muziki wo kuramya no guhimbaza Imana

Jeanne avuga ko afatira icyitegererezo kur Vumiliya Mfitimana

Ari mu bahanzi bacye bafata ikaramu bakandika indirimbo ku kwihana no kugarukira Imana

Jeanne Dufashwanayo afatanya umuziki n'umwuga w'umuganga akorera muri Nyabihu

REBA INDIRIMBO NSHYA "NI KENSHI" YA JEANNE DUFASHWANAYO