Ahabanza Imikino

Patrice Evra na Michael Owen biyongereye ku banyabigwi bategerejwe i Kigali

Yanditswe na: ISHIMWE Walter
Taliki:20/05/2024 22:59 0

Umunsi ku wundi, hagenda hamenyekana abanyabigwi bashya bazitabira igikombe cy’Isi cy’aba Veterans kizabera mu Rwanda. Kuri uyu wa Mbere amazina mashya yamenyekanye ni Patrice Evra na Michael Owen banyuze muri Manchester United.

Kuri uyu wa Mbere ni bwo inkuru yabaye kimomo ko kabuhariwe Patrice Evra na Michael Owen bombi banyuze muri Manchester United, nabo biyongereye ku mubare w'abanyabigwi bazitabira Igikombe cy’Isi cy’aba Veterans kizabera mu Rwanda.

Michael Owen utegerejwe mu Rwanda, yabaye umukinnyi ukomeye mu makipe nka Manchester United na Liverpool, ndetse akaba ari muri ba rutahizamu bafite ibitego byinshi mu ikipe y'igihugu y'u Bwongereza.

Mugenzi we Patrice Evra yabaye myugariro ukomeye mu makipe nka Manchester United, Juventus ndetse n'ikipe y'igihugu y'u Bufaransa.

Igikombe cy’Isi cy’Abakanyujijeho muri Ruhago ku Isi [Veteran Clubs World Championship-VCWC] n’ibikorwa bigishamikiyeho biteganyijwe kuzabera i Kigali tariki 1-10 Nzeri 2024.

Kuri uyu wa Mbere, tariki ya 20 Gicurasi 2024, ubuyobozi bwa VCWC buri gutegura iri rushanwa, bwongeye gutangaza ko Patrice Evra na Michael Owen biyongereye ku banyabigwi bategerejwe mu Rwanda.

Igikombe cy’Isi cy’Abakanyujijeho muri Ruhago ni cyo gikorwa cya siporo cyagutse mu bihuza abatagikina. Si imikino gusa kuko hanateguwe inama zitandukanye, ibikorwa by’imyidagaduro birimo kumurika imideli, ibitaramo, amamurikagurisha n’ibindi bizitabirwa n’abarenga 5,000.

Patrice Evra na Michael Owen biyongereye ku bandi banyabigwi bazitabira iri rushanwa nka Oliver Kahn, Ronaldinho Gaúcho, David Trezeguet, Bacary Sagna, Gaizka Mendieta, Miguela Pauleta, Robert Pirès, José Edmílson, Jay-Jay Okocha, Edgar Davids, Roger Milla, Jimmy Gatete n’abandi benshi.