Ishusho Franco Kabano abona abantu bakwiye gufatamo Turahirwa Moses

Niba ukoresha urubuga rwa X nta kuntu waba ucikwa n’amakuru aba acicikana kuri Moses Turahirwa no kuri Instagram nubwo biba bidashyushye cyane.

Ikintu gikunze kugarukwaho akaba ari ukuntu avuga ibintu rimwe na rimwe mu buryo abantu benshi batamenyereye ubundi muriyi minsi avuga ko ari umukobwa.

Mu kiganiro InyaRwanda yagiranye na Franco Kabano, yagarutse kuri Moses, avuga ko ari we wamwinjije mu ruganda rw’imideli ayimurika ariko bidatinze akaza gutangira no kuyitunganya.

Moses kuva mu ntangiriro ngo yari afite inyota yo gukora ibintu bidasanzwe mu mboni za Kabano, Moses ageze kure ati”Urwego rero agezeho ntabwo ari urwa buri wese.”

Akomoza ku ngingo yo kuba Moses akora ibintu yize yagize ati”Iyo umuntu ari mu bikorwa bye ukabona hari ukuntu ari kubikora wowe utabyumva wirinda kumucira urubanza cyangwa kubibona nkaho ari bibi.”

Iyi ngingo yayishimangiye agira ati”Ibyo wifuza mu muntu ntabwo bivuze ko aribyo agomba kuguha kuko ibyo ngibyo ni wowe ubitekereza na we uri ku isoko ufite inyota yo gutera imbere afite ibindi akora n'ibyo atekereza.”

Kabano asanga mu gihe cyose ntawe Moses Turahirwa abangamiye icyo abantu bafite gukora ari ukumushyigikira kuko kugeza ubu hari benshi atunze.

Agaruka ku buryo atangamo akazi, Kabano yavuze ko Moses afite abakozi bahoraho barenga 30, akagira abamurika imideli yifashisha kandi yishura neza yaba ku gihe n’ingano yayo abaha.

Kabano ati”Reba Moses nka Moshions reba umwana ukodesha iriya nzu buri munsi, afite abandi bakozi bahoraho barenga mirongo itatu, afite abandi bantu akorana nabo mu cyaro.”

Abifuza ko yakumirwa yabagarutseho agira ati”Nuca uruhanga rwa Moses abo bantu uzajya kubatunga.”

 Aboneraho kwibutsa abantu kujya barebebera abandi ku mumaro bafite kurenza gushaka izindi mpamvu rimwe na rimwe zidashinga.Franco Kabano yavuze ko yishimira urwego Turahirwa Moses agezeho, asaba abantu kutamucira urubanza bashingiye ku mpamvu z'imbuga nkoranyambagaFranco Kabano yasabye abantu kurebera Turahirwa Moses ku mumaro afite mu muryango mugari kuruta ibindi