Abanyamideli 10 binjiza agatubutse ku Isi mu 2024 - AMAFOTO

Nubwo uyu mwuga uza mu y’imbere mu guhemba neza, usanga hari bamwe mu bawukora babeshejweho nawo, bawukuyemo ubwamamare ndetse bawukesha n’ubutunzi bafite bwihishe mu bikorwa bitandukanye bibyara inyungu bafite.

Dore abanyamideli 10 bari kwinjiza amafaranga menshi kurusha abandi mu 2024 nk'uko tubikesha urubuga GeeksforGeeks:

1. Naomi Campbell

Naomi Campbell ni umwongerezakazi w'imyaka 53 y'amavuko, akaba ari mu banyamideli binjiza amafaranga menshi kandi wubashywe ku rwego mpuzamahanga, akaba afatwa nk'umunyabigwi mu bijyanye n'imideli bitwe n'ubuhanga ndetse n'ubunararibonye abifitemo. Naomi, uinjiza miliyoni 70 z'amadolari ku mwaka.

2.Giselle Bundchen

Giselle w'imyaka 43 y'amavuko akaba akomoka muri Brazil, amaze imyaka myinshi aza mu b'imbere ku rutonde rw'abanyamideli bahembwa agatubutse ku isi. Amanyerewe cyane mu ntambuko ze zuje ubuhanga no gukorana n'ibigo bifite amazina aremereye. 

Nubwo yigeze kumara imyaka myinshi yarahagaritse ibijyanye no kumurika imideli, uyu mugore yagarutse aje wese mu 2022 nyuma y'uko atandukanye n'uwahoze ari umugabo we, Tom Brady. Giselle yinjiza bybuze asaga miliyoni 50 z'amadolari mu mwaka.

3. Kendall Jenner

Umunyamideli Kendall Jenner w'imyaka 28 y'amavuko, kugeza ubu niwe uza ku mwanya wa kabiri mu guhembwa amafaranga menshi kuruta abandi muri uyu mwaka. Izina ry'uyu munyamerikakazi, rimaze kuba ikimenyabose mu isi y'imideli.

Kwamamara kwe ni ukubera ubuhanga agaragaza muri uyu mwuga, gukorana n'ibigo bikomeye ndetse n'uko akurikirwa cyane ku mbuga nkoranyambaga. Uyu, habarwa ko ku mwaka yinjiza amafaranga angana na miliyoni 40 z'Amadolari ava mu bikorwa bye byose birimo iby'imideli no gukora kuri televiziyo.

4. Karlie Kloss

Karlie Kloss ni izina riremereye cyane haba mu mideli no mu isi y'ikoranabuhanga. Karlie w'imyaka 31, ni umuhanga ntambuko no mu ishoramari, akaba akorera kompanyi zikomeye bikamuhesha amafaranga menshi.

Ntabwo yirebaho gusa, kuko ashyira imbaraga nyinshi mu rubyiruko, aho afite porogaramu zitandukanye zigisha abakobwa bakiri bato ibijyanye n'imideli. Karlie nawe yinjiza miliyoni 40 $ ku mwaka.

5. Chrissy Teigen

Chrissy Teigen ni umunyamerikakazi w'imyaka 38 y'amavuko, akaba ari umugore w'umuhanga uzwiho kugira impano nyinshi zitandukanye no kumenya kuzibyaza umusaruro. Chrissy ni umwanditsi akaba akora no kuri televiziyo kandi byose arabihuza bikamwinjiriza agatubutse mu bijyanye n'imideli. Uyu mugore, yinjiza miliyoni 39 z'amadolari ku mwaka.

6. Doutzen Kroes

Kroes ni umunyamideli w'imyaka 39 uzwiho kwigirira icyizere kiri hejuru mu gihe ari mu kazi ko kumurika imideli. Impamvu akunze kugaragara kuri uru rutonde si ubwiza n'ubuhanga gusa, ahubwo binaterwa n'amasezerano akunze gusinyana n'ibigo bizwi cyane. Doutzen yinjiza miliyoni 32 z'amadolari.

7. Adriana Lima

Adriana Lima w'imyaka 42 y'amavuko, yamenyekanye ahanini nyuma y'uko atangiye gukorana na kompanyi ya Victoria's Secret, gusa nyuma yaje kwamamara cyane bitewe no gukorana n'ibindi bigo bikomeye by'imideli n'ubwiza. Ku mwaka yinjiza miliyoni 30 z'amadolari.

8 Gigi Hadid

Biragoranye kuba waba ukurikirana ibijyanye n'imideli ngo ube utazi Gigi Hadid. Usibye kuba umunyamideli ubirambyemo, Gigi yamaze kubaka ibigwi ku rwego mpuzamahanga. Imigaragarire ye n'uburyo aberwa n'imyambaro yose, byatumye abanyabugeni n'ibigo bikomeye bikora iby'imyambarire bamutera imboni. 

Gigi w'imyaka 28 y'amavuko, yashyizwe ku rutonde rw'abanyamideli bahembwa agatubutse na Forbes mu 2018. Kuri ubu, yinjiza miliyoni 20 z'amadolari mu gihe kingana n'umwaka.

9. Bella Hadid

Umunyamideli Bella Hadid, murumuna wa Gigi Hadid, nawe arazwi cyane muri uru ruganda kubera ubwiza bwe bwihariye, ndetse aza mu b'imbere mu bahembwa agatubutse ku isi. Bella, yinjiza miliyoni 19 z'amadolari ku mwaka.

10. Liu Wen

Liu Wen ufite imyaka 36, ni umunyamideli w'icyamamare ukomoka mu Bushinwa. Liu yanditse amateka yo kuba ariwe munyamideli wa mbere wigaragaje mu birori byo kumurika imideli bya 'Victoria's Secret Fashion show.' Liu yinjiza miliyoni 19 z'amadolari