Bennane w'imyaka 13 yakoze amateka yo gukinira ibihugu 2 mu kwezi kumwe

Uyu mwana w'imyaka 13 asanzwe akinira ikipe y'abato ya K.R.C Genk ikina icyiciro cya mbere mu Bubiligi.

Tariki 21 Gashyantare ni bwo uyu mwana yahamagawe bwa mbere mu ikipe y'igihugu y'u Bubiligi y'abatarengeje imyaka 15. Byabanje kwibazwaho uburyo akiniye ikipe y'u Bubiligi y'abatarengeje imyaka 15 kandi akigaragaza imyaka mike. 

Nyuma yaho gato tariki 8 Werurwe, Bennane yemeye gukinira ikipe y'igihugu ya Maroc. Tariki 26 yakinnye umukino we wa mbere muri Maroc y'abatarengeje imyaka 15, ubwo Maroc yakinaga na Zambia, mu mukino yatsinzemo ibitego 2.

Bennane ubwo yakiniraga ikipe y'igihugu y'u Bubiligi muri Gashyantare bakina n'u Bwongereza 

Nyuma y'uyu mukino Bennane yagiye ku rukuta rwe rwa Instagram, avuga ko yishimiye gukinira ikipe y'igihugu cye cya Maroc. Uyu mwana, abantu benshi mu Bubiligi batangazwa n'impano afite ku myaka 13 kugera naho ibihugu bibiri bitangiye kumurwanira.

Gusa n'ubwo uyu mwana ari mu bihe byiza, ntabwo ameranye neza n'ikipe ye ya Genk, kuko iyi kipe yatangaje ko uyu musore izamurekura umwaka w'imikino urangiye.

Ikipe ya Genk ivuga ko umubyeyi w'uyu mwana yasabye ko bamurekura kuko bamukinisha mu bakinnyi bakuru bigatuma agira ibibazo by'amagufa.

Bennane nyuma y'igihe gito yahise akinira ikipe y'igihugu ya Maroc