Usher yavuze ko ubukwe bwe na Jennifer bwatunguye n’abo mu miryango yabo

Mu ibanga rikomeye cyane mu Kwezi kwa Gashyantare, nibwo umuhanzi Usher yashyingiranwe n’umukunzi we Jennifer Goicoechea bari bamaze imyaka itanu babana.

Aba bombi binjiye mu rukundo mu 2019, basezeranye rwihishwa muri Weekend ya Super Bowl, umukino usoza shampiyona ya Amerika witabiriwe n’ibyamamare bitandukanye. Iyo Weekend yabaye iy’amateka ku muhanzi Usher Raymond IV [Usher] wasusurukije abitabiriye igitaramo cya Super Bowl Halftime Show 2024, akanashyingiranwa n’umugore we, Jennifer Goicoechea.

Mu ijoro ryo ku Cyumweru tariki 11 Gashyantare 2024, Usher yabashishe kwitwara neza ntiyatenguha abari bamuhanze amaso maze akora igitaramo kidasanzwe muri uyu mukino wabeyere i Las Vegas muri Sitade ya Allegiant Stadium aho ikipe ya Kansas City Chiefs yatsinze ikipe ya 49ers ku manota 25 kuri 22.

Ubwo yitabiraga ibirori byo gutanga ibihembo bya NAACP Image Awards 2024, umuhanzi Usher w'imyaka 45 y'amavuko yatangaje ko ubukwe bwe bwatunguye abo mu muryango we n'abo ku ruhande rw'umugore we.

Yagize ati "Byari ibihe bidasanzwe. Mama wanjye yari ahari, Mama we yari ahari, abana bacu bari bahari ndetse n'abo mu miryango yacu ya hafi bari bahari. Ariko mu by'ukuri, buri wese yaratunguwe. Narababwiye nti 'dufite ubukwe aka kanya,' bose baratungurwa cyane."

Usher ni umwe mu bahawe ibihembo bya Image Awards. Ubwo yashyikirizwaga iki gihembo, yafashe umwanya ashimira umugore we, Goicoechea ukomeje kumushyigikira no kumufasha kugera kuri byinshi muri ubu buzima.

Yaragize ati "Bavuga ko inyuma y'umugabo wese ukomeye haba hari umugore ukomeye, kandi ku bw'ibyo ndashimira mama n'umugore wanjye Jennifer wamfashe ukuboko akankomeza. Bana banjye, namwe ndabakunda cyane cyane."

Usher aririmbye muri Super Bowl Halftime Show 2024 ahita yinjira ku rutonde rw’abahanzi barimo Micheal Jackson, Beyoncé, Rihanna, Dr.Dre, Eminem, Lady Gaga na Bruno Mars bazwiho kuba baranditse amateka muri ibi bitaramo ngaruka mwaka bihuzwa n’imikino itegurwa na NFL ishyirahamwe ry’umupira w’amaguru muri Amerika.

Nyuma yo kwandika aya mateka, Usher yagaraye ari kumwe n’umugore we i Las Vegas, mu myambaro myiza ijyanye y’umukara n’umweru berekeza mu kirori giteguza album nshya y’uyu muhanzi yitwa ‘Coming Home.’

Urukundo rwa Usher na Jennifer bafitanye abana babiri, rwatangiye kujya ahagaragara muri Kamena 2019 ubwo aba bombi bitabiraga isabukuru ya Keith Thomas.Usher na Goicoechea bamenyanye bwa mbere mu 2016, gahoro gahoro bagenda baba inshuti zaje no kuvamo urukundo rwa nyarwo rwabaganishije ku kubana nk’umugabo n’umugore.

Usher n'umugore we Jennifer baherutse gukora ubukwe mu ibanga rikomeye cyane