Ellie Goulding yatandukanye n'umugabo we nyuma y'imyaka 4 barushinze

Elena 'Ellie'Jane Goulding ni umuhanzikazi akaba n'umwanditsi w'indirimbo, umaze igihe ari mu bahetse umuziki wo mu Bwongereza. Yagiye akundwa cyane mu ndirimbo z'urukundo nka 'Love Me Like You Do', 'Burn', 'Close To Me', n'izindi. Uyu muhanzikazi kuri ubu ari mu bihe bitoroshye nyuma yo gutandukana n'umugabo we.

Mbere y'uko Ellie Goulding atangaza ko yatandukanye n'umugabo we, hari hamaze iminsi havugwa ko yaba yarafashe umugabo we Caspar Jopling amuca inyuma ku mukobwa w'umu (DJ) uvanga umuziki. Aya makuru yakomeje gukwira no mu binyamakuru byo mu Bwongereza byavugwaga ko aba bombi bahise batandukana.

Hari hashize iminsi bivugwa ko umugabo wa Ellie Goulding yamuciye inyuma

Kuri ubu uyu muhanzikazi yamaze kwemeza amakuru y'itandukana rye n'umugabo be abicishije kuri Instagram agira ati ''Mu nkuru zimaze iminsi zivugwa kuri njye harimo ukuri. Njye na Caspar twaratandukanye ariko ntibyabaye vuba hashize igihe''. 

Uyu muhanzikazi yemeje ko yatandukanye na Caspar nyuma y'imyaka 4 barushinze

Ellie Goulding w'imyaka 37 y'amavuko yakomeje agira ati ''Tuzahora turi inshuti kandi duharanire guha uburere bwiza umuhungu wacu turi gufatanya kurera.'' Ibi abitangaje mu gihe ku mbuga nkoranyambaga biri kuvugwa ko icyabatandukanije ari uko umugabo we yamuciye inyuma.

Batandukanye bamaze kubyarana umwana umwe w'umuhungu

Uyu muhanzikazi uzwiho kuba anandikira indirimbo abandi bahanzi, yatangiye gukundana na Caspar Jolping mu 2016, aza kumwambika impeta y'urukundo mu 2018, barushinga mu 2019. Batandukanye bamaze kubyarana umuhungu w'imyaka Arthur Jopling w'imyaka 2.