Ibyo wamenya kuri Karolina Bielawska witegura kurekura ikamba rya Nyampinga w’Isi

Mu ijoro ryo ku wa Gatatu tariki  16 Werurwe 2022, mu Mujyi wa San Juan muri Puerto Rico, habereye umuhango wo kwimika Nyampinga w'Isi ikamba ryegukanwa na Karolina Bielawaski.

Icyo gihe, iri kamba ryatangwaga ku nshuro ya 70, aho Tonni Ann Sighn wo muri Jamaica yari arimaranye imyaka ibiri nyuma yo gusubikwa kubera icyorezo cya Covid-19.

Ni mu gihe Miss Ingabire Grace ariwe wari wahagaririye u Rwanda rwari rwitabiriye iri rushanwa ku nshuro ya Gatanu, nubwo umuhango wo kwimika Nyampinga w'Isi wabaye we ari i Kigali kuko atabashije kuba muri 40 bageze mu cyiciro cya nyuma.

Uyu munsi, InyaRwanda yaguteguriye ibintu by’ingenzi wamenya kuri Karolina Bielawska witegura kurekura ikamba rya Nyampinga w’Isi.

Karolina Bielawska, ni umukobwa w’imyaka 24 y’amavuko, ukomoka muri Pologne. Yabonye izuba ku ya 11 Mata 1999, avukira mu mujyi wa  Łódź. Ni umukobwa wa Agnieszka Zakrzewska-Bielawska, umuyobozi w'ishami rishinzwe ihuzabikorwa n’imicungire ya kaminuza y’ikoranabuhanga ya Lodz, na Łukasz Bielawski wahoze ari perezida wa ŁKS Łódź

Nyampinga w’Isi wa 2021, afite impamyabumenyi mu bijyanye n’ubucuruzi, yakuye muri kaminuza y’ikoranabuhanga ya Łódź.

Ku ya 24 Ugushyingo 2019, Bielawska yari ahagarariye Łódź muri Miss Polonia 2019 maze yegukana iri kamba, bimuhesha no kuba umukandida wagombaga guhagararira Pologne muri Miss World 2020. Ku bw’amahirwe make, Miss World 2020 yaje guhagarikwa kubera icyorezo cya COVID-19.

Mu 2021 yaje kugumana umwanya we wo guhagararira Pologne muri Miss World. Nyuma y’aho, Karolina yatangiye kugaragara mu bikorwa by’urukundo birimo no gutangiza ikigo cy’igihugu gishinzwe ibikorwa by’ubutabazi cyitwa  "Korona z Głowy," aho yafashaga abantu bose babaga bakeneye ubufasha mu gihe cy’icyorezo cya Covid-19, ambasaderi mu bukangurambaga bwo kurwanya kanseri y’ibere, n’ibindi bijyanye n’umushinga we yajyanye mu irushanwa rya Nyampinga w’Isi.

Uyu mukobwa kandi nk'uko yabisezeranije ubwo yambikwagwa ikamba, yagiye agaragara mu bikorwa bitandukanye bigamije gutinyura abakobwa no gushyigikira icyarengera uburenganzira bwabo cyose.

 Nko mu mwaka ushize, yitabiriye igikorwa cyabereye i Bangalore mu Buhinde cyarebanaga n'ubuzima bw'imyororokere ndetse n'uburyo babona iby'ibanze bakenera byose.

Nyuma y'icyo gikorwa abinyujije ku rukuta rwe rwa Instagram yagize ati: "Njyewe ubwanjye nizera ko buri mukobwa wese afite uburenganzira n'amahirwe yo kugira uruhare ku bintu byose akeneye kandi ntakwiye guterwa ipfunwe no kubivuga cyangwa gusaba ubufasha."

Bielawska yegukana ikamba rya Miss World 2021, yimikiwe mu nzu mberabyombi ya Coca-Cola iherereye i San Juan, muri Porto Rico. Yahise yandika amateka yo kuba umunya-Pologne wa kabiri wegukanye Miss World nyuma ya Aneta Kręglicka wayeguknye mu 1989.

Mu rugendo rwe nka Miss World yasuye ibihugu bitandukanye birimo Afurika y’Epfo, Botswana, Leta Zunze Ubumwe za Amerika, u Buhinde, Leta Zunze Ubumwe z’Abarabu, Ukraine, Phillipines, Singapore, Malaysia, Vietnam, Romania, Indonesia, Côte d'Ivoire,u Bwongereza, n’ahandi henshi.

Mu kiganiro yagiranye na CNN muri Nzeri 2023, Karolina yatangaje itandukaniro yabonye mu bantu akurikije ahantu hanyuranye amaze kuzenguruka ku Isi.

Yagize ati: “Nizera ko nubwo dushobora kuba dufite imico itandukanye, amadini se, ibyo dukunda n’ibindi, nyuma yabyo byose tugira byinshi biduhuza kuruta ibidutandukanya. Navuga ko kwigira kuri buri umwe ari kimwe mu bice byiza byo gutembera ahantu hatandukanye.”

Uyu mukobwa usanzwe ari umunyamideli, akunda kogera muri Piscine no gukina umukino wa Tennis.

Biteganijwe ko mu ijoro ryo ku ya 9 Werurwe 2024, aribwo Karolina Bielawska azambika ikamba rya Nyampinga w’Isi amaranye imyaka ibiri, uzamusimbura mu birori bizabera kuri Jio World Convention Centre mu mujyi wa Mumbai mu gihugu cy’u Buhinde.

Reba hano amwe mu mafoto agaragaza uburanga bwa Karolina Bielawska:

Karolina aritegura gutanga ikamba rya Miss World ku mukobwa uzamusimura