Mukura VS yasubiranye inyuma Amagaju FC irayagonga naho Bugesera FC bikomeza kugorana

Nyuma yuko kuwa Gatanu Rayon Sports na Gasogi United zibimburiye izindi gutangira gukina imikino y'igice cya kabiri cya shampiyona, kuri uyu wa Gatandatu saa cyenda n'andi makipe yakinnye. Kuri sitade mpuzamahanga ya Huye,  Mukura VS yari yahakiriye Amagaju FC. 

Uko uyu mukino wagenze muri make

Umukino watangiye ubona nta kipe irusha indi ariko ku munota wa 3 gusa Malanda Destin ukinira Amagaju FC yabonye amahirwe imbere y'izamu arekuye ishoti rinyura hejuru kure.

Abakinnyi b'ikipe yo mu karere ka Nyamagabe barimo Iradukunda Daniel na kapiteni Masudi Narcise bakomeje kugerageza kurekura amashoti imbere y'izamu rya Mukura VS ariko akanyura impande y'izamu.

Ku munota wa 14 Amagaju FC yabonye penariti, ni ku ikosa Kayumba Sotel yari akoreye Malanda Destin amufatira mu rubuga rw'amahina maze yikubita hasi. Yahise iterwa neza na Bizimana Ibutihaji Ibutihati igitego cya 1 kiba kirabonetse.

Nyuma yo gutsindwa, Mukura VS yatangiye gushaka igitego cyo kwishyura, ku munota wa 19 yari ikibonye kuri kufura yarekuwe na Etoundi Bruno Ronie Younu ariko Samuel Pupong ashyize ku mutwe, umupira unyura hejuru gato y'izamu.

Ku munota wa 34 Amagaju FC yatsinze igitego cya 2 ku mupira wuzamuwe na Iradukunda Daniel, Niyitegeka Otaru ahindurira mu nshundura. 

Nyuma y'umunota umwe gusa Mukura VS yahise ibona igitego cya 1 kuri kufura Mahoro Fideli yazamuriye mu kibuga hagati, Mohammed Sylla ashyiraho umutwe, umupira ujya mu izamu. Igice cya mbere cyarangiye Amagaju FC ikiyoboye n'ibitego 2-1 bya Mukura VS.

Mu gice cya kabiri, ikipe ya Mukura VS yaje ikora impinduka mu kibuga havamo Iradukunda Elie Tatou hajyamo Kubwimana Cedric.

Ku munota wa 50 iyi kipe yo mu karere ka Huye yaje kubona penariti ku ikosa Iradukunda Daniel yakoreye Nisingizwe Christian amutegera mu rubuga rw'amahina. Yahise iterwa na Kubwimana Cedric ayitereka mu izamu igitego cya 2 kiba kirabonetse.

Ikipe y'Amagaju FC nyuma yo kwishyurwa yatangiye guhuzagurika nk'aho myugariro wayo Iradukunda Janvier yari yitsinze igitego kuri kufura yari itewe na Muvandimwe Jean Marie Vianney ariko Imana ikinga ukuboko.

Ku munota wa 78, Mukura VS yabonye igitego cya 3 ku mupira Mahoro Fideli yazamuye maze Samuel Pupong ashyira ku mutwe ariko kubera ubwumvikane buke ku bari ba myugariro b'Amagaju FC, umunyezamu Ndikuriyo Patient ahita yitsinda.

Umukino waranngiye Mukura VS isubiranye inyuma Amagaju FC iyatsinda ibitego 3-2.

Mu yindi mikino yabaye, Bugesera FC yanganyije na AS Kigali, Musanze FC inganya na  Etoile de l'Est naho Gorilla FC itsinda Etincelles FC ibitego 2-1.

Mohammed Sylla watsinze igitego cya 1 cya Mukura VS

Mukura VS yasubiranye inyuma Amagaju FC iyatsinda ibitego 3-2