Georgina Hale wakunzwe muri filime ‘Emmerdale’ yitabye Imana ku myaka 80

Georgina Hale witabye Imana afite imyaka 80, yamenyekanye cyane muri filime yitwa ‘Emmerdale,’ ndetse na ‘Hollyoaks.’

BAFTA yahaye icyubahiro uyu mugore, ivuga ko yari amaze imyaka mirongo itanu agaragara kuri filime, kandi akina amafilime ndetse n’amakinamico.

Babinyujije ku rubuga rwa X [Twitter] BAFTA bagize bati: "Twababajwe no kumenya urupfu rwa Georgina Hale.

Yari azwi cyane ku bikorwa bye byagiye bimuhesha gutsindira ibihembo muri filime za Ken Russell, aho yahawe igihembo cy’umukinnyi mushya utanga icyizere mu kuyobora filime mu 1975."

Nubwo impamvu y'urupfu  rwa Georgina itaramenyekana, bikekwa ko yaba yaritabye Imana ku ya 4 Mutarama.

Umukinnyi wa Filime Jude Rawlins yanditse kuri X ati"Nababajwe cyane no kuba twatakaje Georgina Hale. Yari umukinnyi mwiza cyane ndetse nari narigeze no kubimubwira. Hari igice nari naranditse yagombaga kuzakina muri filime yanjye, ariko ubu nta gitekerezo mfite cy’umuntu uzashobora kugikina.”

Abafaba be bamukundiraga ijwi rye ritashidikanyarwaho n’uwari we wese, bakamusobanura nk’umuntu w’igitangaza muri byose.

Hale wavukiye i Ilford muri Essex, yari azwi cyane kubera uruhare yagize muri filime za Ken Russell mu myaka ya za 70. Harimo filime Mahler yo mu 1974, ishingiye ku buzima bw’uwahimbye Gustav Mahler, aho Hale yakinnye nka Alma, bikaza no kumuhesha igihembo cya BAFTA.

Yatangiriye umwuga wo gukina filime muri kompanyi ya Royal Shakespeare mu 1965 muri filime yitwa West End. Yakinnye na Beryl Chugspoke muri Emmerdale mu 2006 na Blanche Longford muri Hollyoaks muri 2010-11.

Uyu mukinnyi yashakanye na John Forgeham mu 1964 ariko nyuma baza gutandukana.

Umukinnyi wa filime, Hale Georgina yitabye Imana ku myaka 80 y'amavuko

Yari amaze imyaka 50 akina filime