Saido Ntibazonkiza washatswe na APR FC 2006, ashobora kuyikinira mu mataha

Saido Ntibazonkiza ni umukinnyi w'ikipe ya Simba SC ikina icyiciro cya mbere muri Tanzania ndetse akaba n'umukinnyi w'ikipe y'igihugu y'u Burundi. Uyu musore uzwiho gutera neza imipira y'imiterekano, ntabwo ari kuvuga rumwe na Simba ku bijyanye no kongererwa Amasezerano.

Uyu mukinnyi ukina afasha abataha izamu, yageze muri Simba SC mu Kuboza 2022 avuye mu ikipe ya Geita Gold. Ntibazonkiza akaba yari yasinyiye Simba SC amasezerano y’umwaka umwe n’igice aho asigaranye amasezerano y’amezi 6 gusa.

Asanzwe ari umukinnyi ukomeye w'ikipe y'igihugu y'u Burundi

Simba SC yifuje kumwongera amasezerano aye atararangira, aho yashakaga kumuha umwaka ariko we akifuza ko iyi kipe yamwongerera amasezerano y’imyaka 2.

Simba ntabwo ikozwa ibyo kongerera uyu musore amasezerano y'imyaka ibiri bigendanye n'imyaka afite, ariyo mpamvu bifuza kuba bamutanga muri Mutarama kugira ngo atazagendera ubuntu.

APR FC iherutse kugaruka muri gahunda zo gukinisha abakinnyi barimo abanyamahanga, yahise yungukira muri uku kutumvikana itangira ibiganiro na Simba ndetse bigenda ndeza kuko Simba SC yiteguye kugurisha umukinnyi, nubwo we ibintu bya APR FC atabyumva neza.

ku myaka 36, Saido arashaka amasezerano y'imyaka 2 nibura yasanga afite imyaka 38

APR FC ifite gahunda y'uko imikino ya Mapinduzi Cup igiye kwitabira izabera muri Zanzibar, izavayo inogeje ibiganiro na Simba SC ndetse n'umukinnyi, dore ko iyi kipe bari mu itsinda rimwe.

Ntabwo ari ubwa mbere APR FC yaba ishatse uyu mukinnyi, kuko mu 2006 ubwo yaza mu ikipe ya Rayon Sports, APR FC yabyivanzemo birangira nta kipe n'imwe akiniye yigira hanze.

Ntabwo ari Saido Ntibazonkiza gusa ushobora gutandukana na Simba SC, kuko Moses Phiri, Clatous Chama bakomoka muri Zambia na Jose Louis Miquissone ukomoka muri Mozambique, bose bashobora gutandukana n'iyi kipe. 

Yananijiye ikipe ya Young African kuva 2020-22