Umunyamategeko Francis Byaruhanga yanditse igitabo “Fall of gods” gishyigikira uburenganzira bw’umugore

Igitabo “Fall of gods” kivuga ku burenganzira bw’abagore n'uko bakwiye kwitabwaho bagahabwa agaciro, kigaruka ku muco wa kera n'uko bafatwaga.

Mu kiganiro n’umunyamategeko Fracis Byaruhanga, yavuze ko yahisemo kwandika ku burenganzira bw’abagore bitewe n’agaciro gakomeye yabonye bakwiye guhabwa.

Yatangaje ko yahisemo kwandika ku mugore kuko umugore mwiza agaragaza n’isura nziza y’umuryango nyarwanda. Yumvikanisha ko binyuze mu kubaha umugore, haboneka icyerekezo kizima cy’Igihugu.

Mu mikurire ye yababazwaga n’uburyo abagore bafatwa nabi bikamutera kumva yakora ubuvugizi. Yatangaje ko yakuriye mu miryango ikiri hasi mu myumvire ku buryo umugore yafatiranwaga ntahabwe agaciro nk'uko bikwiye.

Yagize ati “Nakuze mbona ukuntu abagore bafatwa nabi. Nakuriye muri sociyete navuga ko bari abantu bakiri inyuma mu iterambere, aho imiryango yashoboraga guhitiramo abana babo uwo bazabana”.

Yagarutse ku muco wa kera wabangamiraga umugore nyarwanda. Yatanze urugero avuga ko abagore ba kera baterurwaga, bakimwa uburenganzira bwo kurya ibyo bashaka, n’ibindi babuzwaga bibangamira uburenganzira bwabo ntibahabwe ijambo.

Umwanditsi w’ibitabo akaba umunyamategeko, Francis Byaruhanga, utuye mu Karere ka Kicukiro mu Mujyi wa Kigali, yatangaje ko iki gitabo kigaruka no ku rukundo nka kimwe mu bintu bikenewe na buri wese.

Atangaza ko urukundo rwarangaga abanyarwanda ba kera rukwiye gusigasirwa hubakwa umubano mwiza n’ahazaza h’Igihugu n’umuryango nyarwanda.

Nyuma yo kugira ibyiyumviro byo guharanira uburenganzira bw’abagore no gushyigikira iterambere ryabo, Byaruhanga Francis yashishikarije abanyarwanda n’abandi basomyi kwita ku gitsinagore nk'uko ari ba nyina w’abantu.

Ni umwe mu bagize amahirwe yo gusobanukirwa ibyiza n’umugisha uva mu gushyigikira umugore no ku mwumva. Ibyo yabonye mu buto bwe birimo gukandamiza umugore byatumye yiha intego yo kuzandika ku buzima bwabo no kwandika ibyiza bakwiriye guhabwa.

Mu byamubabaje cyane byatumye yumva akwiye kwandika igitabo kuri bo, harimo urushako rwabo rwa mbere. Avuga ko kera bateruraga abagore cyangwa bagashakwa ku gahato batagize amahitamo yabo bwite, bigatuma bahora mu gahinda.

Byaruhanga Francis yakoreye ibinyamakuru birimo The NewTimes guhera muri 2016 kugeza 2018, akorera The Independent ya Andrew Mwenda, akora kuri The East African muri 2019.

Nyuma yo kureka itangazamakuru yahindutse umunyamategeko mu kigo gishinzwe gutanga ubufasha mu by'amategeko cyitwa Calibre Advocates.

Ashimira abagize uruhare mu gutunga iki gitabo barimo Patrick Nzabonimpa, Enock Luyonza na Esther Uwase bamufashije kugira ngo iki gitabo cye kibe kinozwe.

Mu butumwa yageneye abasomyi, yabasabye gusoma iki gitabo bagaharanira uburenganzira bw’abagore ndetse bakigisha abakiri bato kuba ingirakamaro mu muryango no ku gihugu.

Umunyamategeko Byaruhanga Francis yanditse ku burenganzira bw'abagore