Mugisha Moise yegukanye agace ka mbere ka shampiyona y'igihugu y'Amagare - AMAFOTO

Kuri uyu wa Gatandatu tariki 17 Kamena 2023, ni bwo hakinwe umunsi wa mbere wa shampiyona y'igihugu mu mukino wo gusiganwa ku magare umwaka w'imikino 2023.

Ni shampiyona yakinwe mu byiciro bigera kuri bine, aho icyiciro cya mbere cyari abana bato b'abahungu n'abakobwa, hakaba icyiciro cy'ingimbi n'abangavu ndetse n'icyiciro cy'abagabo n'abagore.

Mu bagabo, Mugisha Moise ukinira Benediction Club yahize bagenzi be, akoresha iminota 39' n'amasegonda 38" (39' 38") ku Ntera ya Kilometero 30. Tuyizere Etienne na we wa Benediction Club yafashe umwanya wa kabiri, akoresha iminota 40'01" naho Nsengiyumva Shemu ukinira May Stars aba uwa Gatatu, akoresheje 40'17".

Mu cyiciro cy'abagore bakuze, Ingabire Diane ukinira ikipe ya Canyon Sram Generation yo mu Budage yabaye uwa Mbere akoresheje iminota 40'59 akurikirwa na Nzayisenga Velentine bakina mu ikipe imwe batandukanywa n'amasegonda 40' naho Ntakirutimana Marthe wakinnye ku Giti cye afata umwanya wa Gatatu, aho yakoresheje iminota 42' 20".

Shyaka Janvier ukinira Les Amis Sportifs y'i Rwamagana yegukanye umwanya wa mbere mu cyiciro cy'ingimbi, aho yagenze ibilometero 26 mu minota 36'45" akurikirwa na Nshutiraguma Kevin wa Cine Elmay ku kinyuranyo cy'amasegonda 9, naho Tuyizere Hashim ukinira Les Amis Sportifs aza ku mwanya wa Gatatu akoresheje iminota 37 n'amasegonda 42.

Mu cyiciro cy'abangavu, hakinnye abakobwa babiri gusa, aho Uwera Aline yafashe umwanya wa mbere, nyuma yo gukoresha iminota 34' n'amasegonda 56" ku Ntera ya Kilometero 22 naho Byukusenge Mariathe akoresha iminota 35' n'amasegonda 15.

Kuri iki cyumweru iyi shampiyona irakomeza hakinwa umunsi wa kabiri aho abasigwa bari buhagurukire i Kanyinya bakagera i Gicumbi bakagaruka mu Mujyi wa Kigali. 

Mugisha Moise agiye kumara umwaka ariwe mukinnyi mu Rwanda ufite ibihe byiza mu gusiganwa n'ibihe 

Moise yahise yambikwa umwenda urimo ibirango by'ibendera ry'igihugu 

Ingabire Diane uri hagati niwe wabaye uwa mbere mu bagore 

Mugisha Moise ubwo yageraga aho basorezaga yari afite umuvuduko uri hejuru