Suède: Amb. Diane Gashumba yakiriye Israel Mbonyi mbere y’igitaramo-AMAFOTO

Byabaye kuri uyu wa Gatanu tariki 16 Kamena 2023, ubwo Israel Mbonyi n’abamuherekeje mu rugendo rw’ibitaramo ari gukorera ku Mugabane w’u Burayi, bageraga muri iki gihugu cya Suède, aho agomba gukorera igitaramo kuri uyu wa Gatandatu tariki 17 Kamena 2023.

Ambasade ya Suède yatangaje ko Israel Mbonyi yagiranye ibiganiro na Amb. Diane Gashumba yitegura igitaramo gikomeye akorera mu Mujyi wa Örebro.

Bateguje Abanyarwanda n’abandi batuye muri uyu Mujyi kudacikwa n’iki gitaramo cyo kuramya no guhimbaza Imana n’ibihe byo kwegerana n’Imana.

Israel Mbonyi uherutse gusohora indirimbo ‘Nk’Umusirikare’ yitiriye album ye ya Gatanu, agiye gutaramira muri iki gihugu mu gihe aherutse gukorera igitaramo cy’urwibutso mu Bubiligi kitabiriwe n’abantu barenga ibihumbi 2500.

Muri Kamena 2021, nibwo Dr. Diane Gashumba yagizwe Ambasaderi w’u Rwanda muri Suède. Mu kiganiro aherutse kugirana na InyaRwanda, Dr Diane yavuze ko icyizere Perezida Kagame yamugiriye ‘ari inshingano ziremereye’.

Yavuze ko yakiranye ibyishimo izi nshingano yahawe. Kandi, Perezida Kagame yamubonyemo umusanzu yatanga nyuma y’abandi bamubanjirije. Ati “Ni inshingano nakiriye n’ibyishimo. Ariko nanone, no kumva y’uko nyine ngomba gukoresha imbaraga zose kugirango ubutumwa yampaye mbusohoze neza.”

Yavuze ko Abanyarwanda batuye muri ibi bihugu bakunda igihugu cyabo (U Rwanda), bakarangwa no gukora cyane.

Si ubwa mbere Dr. Diane yakiriye abahanzi, kuko mu bihe bitandukanye yakiriye abarimo Patient Bizimana, Bruce Melodie n’abandi.

Gashumba avuga ko akunda indirimbo zubakiye ku muco w’u Rwanda. Kandi, akunda abahanzi barimo Cecile Kayirebwa. Ati “Indirimbo za Kayirebwa ziramfasha cyane kuruhuka mu mutwe... Ariko nkunda n’abandi bahanzi benshi.”

Anavuga ko akunda ibihangano by’abahanzi barimo Masamba Intore na Jules Sentore.

Dr Gashumba yavuze ko ashingiye aho bigeze, abahanzi bo mu Rwanda bari gutera imbere, anashingiye ku bitaramo bagenda bakorera ahantu hanyuranye.

Amb. Dr. Diane Gashumba yakiriye kandi agirana ibiganiro na Israel Mbonyi mu gihe habura amasaha macye agataramira muri Suede 

Israel Mbonyi ari kumwe n’abarimo umuvandimwe we Shema bakiriwe muri Suede

Ambasade ya Suede yasabye Abanyarwanda kwitabira iki gitaramo kigamije guhimbaza Imana 

KANDA HANO UREBE IKIGANIRO TWAGIRANYE NA AMB. GASHUMBA