Byinshi wamenya ku muco nyarwanda n’uko wasigasirwa

Umuco nyarwanda urangwamo ibyishimo by’umuryango birimo gutarama, imisango y’ubukwe, kugabirana inka no guhana igihango nk’ikimenyetso cy’ubumwe bwabo n’ibindi.

Benshi bavuga ko gutakara k’umuco nyarwanda byagiye bihabwa intebe bitewe no kwigana imico yo mu bindi bihugu, no gutatira indangagaciro na kirazira byarangaga abanyarwanda.

Abandi bavuga ko iterambere ryazanye byinshi harimo no kwibagirwa ibikwiye kuranga umunyarwanda nyakuri, bikarangira bigoranye gutandukanya umuryarwanda n’umunyamahanga.

Nyamara abahanga mu miyoborere inoze bavuga ko inzira ya mbere mu gusigasira umuco w’Igihugu ari ukumenya amateka yacyo no kugendera ku mategeko akigenga no kudakururwa n’imico igaragara ku bandi bigashimangirwa no gukunda uwo uriwe n’Igihugu cyakubyaye.

Kera mu muco nyarwanda, umuryango waturaga hamwe kandi abana bagakurira mu maso y’ababyeyi bahabwa igitsure gihagije ndetse n’urukundo rwabo.

Byafashaga umwana gukura akunda umuryango kandi azi inshingano zimutegereje kugira ngo azavemo umugabo, dore ko nta kibazo cy’imibereho bagiraga cyane.

Muri iyi minsi umuryango utatanira kure ku bwo gushaka imibereho, aho kugira ngo abana barerwe n’ababyeyi bakarerwa n’abaturanyi cyangwa abandi, bakazana imico itandukanye bitewe no kwigenga.

Ababyeyi bakwiye gufatirana akanya bafite bari kumwe n’abana bakabigisha uko umunyarwanda akwiriye kwitwara bagasigasira ubusugire bw’Igihugu cyabo.

Umwaduko w’abakoroni uri mu bintu byahungabanije umuco nyarwanda, kuko hari byinshi byagiye bihinduka birimo imyizerere, kwiga indimi, guhungabanya ubumwe bw’abanyarwanda bigendeye ku moko n’ibindi.

Ubu u Rwanda rwamaze gusobanukirwa n’amateka mabi rwahuye nayo bitewe n’amacakubiri yabibwe agateza ibibazo byinshi birimo na Jenoside yakorewe Abatutsi mu 1994.

Kimwe mu bintu abanyarwanda bakeneye cyane cyane urubyiruko harimo kwigishwa ubumwe bwasenywe bw’abanyarwanda, n’uko bwagarurwa, nkuko byari mu muco nyarwanda na cyane ko bose ari bene mugabo umwe.

Kera ababyeyi bicazaga abana bakabacira imigani bakabasekera bigatinda, ubuzima butarahinduka ngo bihugireho nk'ubu, bigatuma ababyeyi baboneraho gutoza abana ingeso nziza.

Ariko ubu abana bahugira kuri televiziyo, abamaze gukura bakirirwa kuri za murandasi bareba ibidakwiye bibangiriza ubwonko, bigatuma abenshi bifuza kwisanisha n’imico babona ku bantu bo mu bindi bihugu.

Ikigo cy’uburezi mu Rwanda, REB, cyatangaje ko “Kuri ubu rero, ibitaramo mu miryango bisa n’aho byacitse. Usanga ahenshi byarasimbuwe no kureba televiziyo cyangwa kumva radiyo. Ababyeyi usanga batakigira umwanya wo gutaramana n’abana babo kubera imirimo myinshi no gushakisha amafaranga. Hari kandi n’abava mu kazi bakajya kwiga nimugoroba”.

Ababyeyi bakwiye kwigisha abana ko ubuzima bwiza bw’Igihugu buri mu maboko yabo, ibyo bigatuma bakurana intego zo kuzaba abafatanyabikorwa b’Igihugu mu kubaka umuco utajegajega nubwo ubuzima bwaba bubagoye bakabizirikana.

Nubwo iterambere ryakwiyongera ntabwo rikuraho umuco ukwiye kuranga abanyagihugu, kandi kuba bamwe bawutakaza ntibivuze ko umuco udahari. Umuco ukwiriye gusigasirwa kuko ari wo utandukanya Igihugu n’ikindi, umuntu n’uwundi.

Umuco nyarwanda ukwiriye gusigasirwa, ababyeyi bakaganiriza cyane abana babo