Abakinnyi 10 batumbagirije agaciro mu gikombe cy'Isi 2022 bakaba bahataniwe ku isoko

Imikino 64 yabaye, yaranzwe n'amakosa make cyane mu bwugarizi, ahagaragaye guhagarara neza kwa ba myugariro by'umwihariko abakinira amakipe y'ibihugu asa n'aho atari akanganye mbere yo kwinjira mu irushanwa nyir'izina.

Benshi mu bakinnyi bigaragaje neza muri Qatar, byabazamuriye agaciro ku isoko ry'igura n'igurisha ku buryo bari kwifuzwa n'amakipe akomeye by'umwihariko ayo ku mugabane w'u Burayi. 

Hifashishijwe imbuga zerekana uko abakinnyi bahagaze ku isoko ndetse n'imibare bavanye mu gikombe cy'Isi, twegeranyije urutonde rw'abakinnyi 10 bo mu bihugu bitandukanye, byitezwe ko bazahatanirwa n'amakipe muri Mutarama 2023 kuko bigaragaje neza mu gikombe Cy'Isi.

10. Alexis Mac Allister

Amakipe ya Arsenal na Chelsea aravugwaho kwifuza Mac Allister usanzwe akina hagati muri Brighton Hove & Albion, nyuma y'uko yitwaye neza agafasha Argentine gutwara igikombe Cy'isi, mu gihe nyamara benshi batamubonagamo ubushobozi.

Allister w'imyaka 23 y'amavuko yiyerekanye nk'umukinnyi utananirwa vuba kandi uzi kwambura umupira ikipe bahanganye, byiyongera ku kuba afite umuvuduko uhagije iyo ajya gutabara izamu rye.

Mac Allister ari mu bihe by'umunezero

Ikipe ya Brighton yaguze Mac Allister muri 2019, ibanze kumutiza muri Argentino Junios yakuriyemo ndetse no muri Boca Juniors, mbere yo kumugarura mu Bwongereza mu mwaka w'imikino wa 2020-2021.

Kuri ubu afite agaciro ka Miliyano 32 z'Amayero ku rubuga rwa Transfermarket rupima igenagaciro ku bakinnyi n'amakipe, mu gihe abo mu ikipe ye bo bavuga ko badsashobora gukozwa Amayero ari munsi ya Miliyoni 70.

9. Dominik Livakovic

Umunyezamu wa mbere w'ikipe y'igihugu ya Croatia ni umwe mu bigaragaje neza mu gikombe Cy'isi by'umwihariko mu gufata Penaliti, ari naho yafashirije ikipe ye gusezerera Brazil n'u Buyapani.

Manchester United yigeze gushaka kugura Livakovic mu mpeshyi y'uyu mwaka ariko birangira ihisemo gutizwa Martin Dubravka wavuye muri Newcastle united, akaza gukoreshwa nk'umusimbura wa David De Gea.

Livakovic yagurukiye Penaliti za Brazil

Uyu munyezamu ufite agaciro ka Miliyoni 10€ biavugwa ko yifuzwa n'amakipe ya Chelsea, Juventus na Bayern Munchen, mu gihe Dinamo Zagreb akinira yo ivuga ko igikeneye kumukoresha.

8. Yassine Bonou

Amakipe ya Aston Villa, Inter Milan na Real Madrid akomeje kwerekana ko yifuza kugura umunyezamu 'Bono' wigaragaje nk'igihangange mu gikombe cy'Isi, agafasha ikipe ya Marooc kugera muri 1/2, isezereye Espagne kuri Penaliti ndetse na Portugal yasoje umukino itinjije umupira n'umwe mu izamu rye.

Yassine Bonou w'imyaka 31 y'amavukko asanzwe ari umunyezamu wa mbere ndetse ngenderwaho mu ikipe ya Sevilla ikina muri Shampiyona y'icyiciro cya mbere muri Espagne.

Bono

7. Yunus Musah

Diamora Musah ukomoka muri Ghana yabanje mu kibuga mu mikino 4 yose ikipe y'Igihugu ya Leta Zunze Ubumwe Z'America yakinnye mu gikombe cy'Isi cya 2022, yiyerekana nk'umunyempano ukomeye wo mu kibuga hagati, ahanini mu kwambura imipira abakinnyi b'ikipe bahanganye.

Uyu musore w'imyaka 20 ukina muri Valencia yo muri Espagne biravugwa ko yifuzwa na Liverpool ndetse na Arsenal yakuriyemo, ishobora kumwisubiza. Afite agaciro ka Miliyoni 20 z'Amayero ku rubuga rwa Transfermarket ariko ibinyamakuru byandikirwa i Madrid bivuga ko ikipe ye nibura yamutanga kuri Miliyoni 45€.

Musa ashobora kugaruka muri Arsenal yakuriyemo

6. Sofyan Amrabat

Abarebye umukino w'u Bufaransa na Marooc mu gikombe Cy'Isi, bibukira Sofyan Amrabat kuri 'tackle' ikomeye yateye Kylian Mbappe aramubandagaza ndetse amubuza gutsinda igitego mu izamu ryari ririnzwe na Yacine Bonou.

Amrabat asanzwe akina hagati muri Fiorentina  yo mu Butaliyani, aho yageze muri 202o, aguzwe Miliyoni 19 z'Amayero muri Hellas Verona. Amakuru aravuga ko Tottenham yifuza kumutangaho Miliyoni 50€, mu gihe kandi yifuzwa na FC Barcelona, Liverpool na Atletico Madrid.

Amrabat yasimbukiye Mbappe yemeza benshi ko ari umuhanga

5. Josko Gvardiol

Nubwo myugariro Gvardiol yacenzwe bikomeye na Messi ndetse bakamutsindana kimwe mu bitego byasezereye ikipe ya Croatia muri 1/2 cy'igikombe Cy'Isi, ntibikuraho ko mu mikino ya mbere yari yigaragaje neza, aho yafashije 'Hrvastka' gusezerera Brazil muri 1/4.

Uyu munyempano w'igihagararo cyiza n'imyaka 20 gusa yaguzwe na RB Liepzig Miliyoni 18€ mu mwaka ushize imukuye muri Dinamo Zagreb, ariko igiciro cye gikomeje gutumbagira ku buryo ashobora kuzagurwa arenga Miliyoni 90 mu minsi iri imbere. Amakioe amwifuza arimo Chelsea, Real Madrid na Manchester City.

Gvardiol ahagaze neza ku isoko

4. Julian Alvarez

Alvarez w'imyaka 22 y'amavuko yakinnye imikino 7 mu gikombe Cy'Isi, atsindira Argentine ibitego 4 binayifasha gutwara igikombe. Ntabwo yari amahitamo ya mbere ku mutoza Lionel Scaloni ariko yaserutse gitwari asimbura neza rutahizamu Lautaro Martinez werekanye mu mukino wa mbere ko adahagaze neza.

Biragoye ko hari ikipe yabasha gushyigura Alvarez ku ntebe y'abasimbura ya Manchester City aho akina asimbuye Earling Haaland, ariko agaciro ke ku isoko gakomeje kuzamuka umunsi ku wundi, mu gihe bigaragara ko na we ubwe ashobora kuba ngenderwaho mu gihe Halaand adahari.

Alvarez mu kirere asezerera Croatia

3. Cody Gakpo

Manchester United yagendanye imbaraga nke ntiyabasha gusinyisha rutahizamu Cody Gakpo mu mpeshyi ya 2022, ariko kuri ubu Dail Mail ivuga ko iyi kipe iteganya gushyiraho igiciro simusiga ngo izabashe kwegukana uyu rutahizamu wa PSV Eindhoven muri Mutarama 2022.

Gakpo w'imyaka 22 y'amavuko yatsinze ibitego 3 mu mikino 5 yakinnye mu gikombe cy'Isi cya 2022. Uyu musore ukomoka muri Togo afite agaciro ka Miliyoni 45€ ku rubuga rwa Transfermarket, mu gihe PSV Eindhoven yo ivuga ko imwifuzamo Miliyoni 80€.

Cody Gakpo

2. Azzedine Ounahi

Leicester yo mu Bwongereza yatangije ibiganiro mbere y'uko igikombe Cy'isi kirangira, aho yahamagaye mu ikipe ya Angers SCO mu Bufaransa, ibaza ingano y'amayero yatanga ngo ihabwe Azzedine Ounahi wigaragaje ubwo yakinaga hagati mu ikipe ya Marooc akayifasha kugera muri 1/2 cy'igikombe Cy'Isi isezereye Espagne na Portugal.

Ounahi w'imyaka 22 y'amavuko afite agaciro ka Miliyoni 3 z'amayero ku rubuga rwa Transfermarket ariko Leicester City yamaze gutanga ubusabe bwo kumuhabwa igatanga Miliyoni 40. 

Mu gikombe Cy'Isi, Ounahi yiyerekanye nk'umukinnyi w'amacenga menshi kandi usatira izamu akanamenya gutanga neza imipira kuri ba rutahizamu, byiyongera ku mashoti aremereye ateresha amaguru ye atari manini.

Amaguru mato ya Ounahi arekura amashoti y'imizinga

1. Enzo Fernandez

Ikipe ya Benfica Lisbon yo muri Portugal ikomeje kubyinira ku rukoma, bitewe n'uko umukinnyi wayo Enzo Jeremias Fernandez akomeje kwifuza n'amakipe akomeye umunsi ku wundi, ku buryo bateganya kumwungukamo arenga Miliyoni 80 z'Amayero.

Enzo w'imyaka 21 yitwaye neza mu kibuga hagati, afasha Argentine kwegukana igikombe Cy'Isi, ndetse anahembwa na FIFA nk'umukinnyi mutoya witwaye neza kurusha abandi.

Amakipe nka Real Madrid, Chelsea na Manchester United akomeje kugaragaza ko ashaka uyu musore, mu gihe hari amakuru avuga ko ikipe ye yamaze kumvikana na Liverpool ko azatangwaho Miliyoni 80 z'Amayero muri Mutarama 2022.

Fernandez yahembwe nk'umuto witwaye neza kurusha abandi mu gikombe cy'Isi

Fernandez utumbagije igiciro mu gihe gito cyane, yageze muri Benfica mu mpeshyi y'uyu mwaka avuye muri River Plate yo muri Argentine, aho yatanzweho Miliyoni 12 z'Amayero gusa.