Bitunguranye, umunyezamu Andre Onana yasezeye mu ikipe y'igihugu ya Cameroun

Mu gitondo cyo kuri uyu wa 5 ni bwo Andre Onana yatangaje ko ahagaritse gukinira ikipe y'igihugu cyamwibarutse akazakomeza kuyishyigikira nk'umufana.

Onana yagize ati: "Ndibuka uburyo twareba imikino y'ikipe y'igihugu nk'umuryango. Umuntu ukomoka muri Cameroun ni we wabyumva neza icyo bisobanuye kureba ikipe y'igihugu ikina, ndetse icyo gihe ni bwo natangiye kugira inzozi zo kuzakinira ikipe y'igihugu. Nyuma y'imikino nayikiniye, imyitozo nakoze n'ingendo nakoze, navuga ko ubu nageze ku nzozi narotaga."

Onana akomeza avuga ko ibyiza byose yagize mu Ikipe y'igihugu bigeze ku iherezo. Ati: "Buri nkuru  igira iherezo ryayo, ariyo mpamvu inkuru yanjye n'ikipe y'igihugu igeze ku iherezo. Abakinnyi baraza bakagenda ariko ikipe y'igihugu izahoraho.  

Ibyiyumviro byanjye ku ikipe y'igihugu ntibizigera bihinduka, ndetse n'umutima wa Cameroun uzakomeza gutera nk'ibisanzwe. Aho nzajya hose nzakomeza kurwana ku ibendera ry'igihugu cyanjye ndetse ndarengera igihugu cyanjye mu buryo bumwe cyangwa ubundi. Ndakomeza gushyigikira ikipe y'igihugu nk'umufana, nk'uko miliyoni zisaga 27 zituye Cameroun zibikora".

Onana asezeye mu ikipe y'igihugu nyuma yo kugira ibihe bitari byiza mu gikombe cy'Isi byanatumye atandukana n'abandi yisubirira mu rugo. Muri Gicurasi mu 2016 ni bwo yakiniye Cameroun umukino wa mbere, akaba asezeye amaze kuyikinira imikino 34.

Onana asanzwe ari umunyezamu wa Inter Milan