Igikombe cy'isi: U Bufaransa bwarangije itsinda bwemye, Australia ibona tike bigoranye

Mu mikino yo mu itsinda D, ikipe y'igihugu y'u Bufaransa yagiye gukina yarakatishije itike cyera, yatsinzwe n'ikipe y'igihugu ya Tunisia, naho undi mukino wabaye ufite igisobanuro gikomeye ku ikipe iba 2 muri iri tsinda Denmark yatsinzwe n'ikipe y'igihugu ya Australia.

Ikipe y'igihugu y'u Bufaransa yinjiye mu kibuga n'ubundi ibizi ko yamaze kubona itike, nta mbaraga nyinshi yatangiranye umukino ahubwo ikipe y'igihugu ya Tunisia niyo yatangiye yataka ishaka igitego. 

Ku munota wa 7 gusa, ikipe y'igihugu ya Tunisia yari yamaze kubona igitego ariko umusifuzi aracyanga bitewe n'uko Nadhari Ghandri wagitsinze yari yaraririye.

Tunisia yakomeje kwataka inashaka uburyo bw'igitego ariko abakinnyi b'u Bufaransa bakomeza kwihagararaho ntibatsindwa igitego. Ku munota wa 33 Tunisia yongeye ihusha ubundi buryo bw'igitego ku mupira mwiza wari uhinduwe neza imbere y'izamu na Ali Maalooul ariko Camavinga aratabara umupira awushyira muri koroneri. Igice cya mbere cyarangiye ikipe y'igihugu ya Tunisia inganya 0-0 n'ikipe y'igihugu y'u Bufaransa.

Tunisia yinjiye mu gice cya kabiri ikomeza kwataka maze birabahira ku munota wa 58 Wabhi Khaziri akuye umupira hagati agenda agundagurana ahita atsinda igitego cya mbere cya Tunisia.

Igitego cya Tunisia

Nyuma y'uko u Bufaransa butsinzwe igitego, bwahise bushaka uko bwishyura bituma ku munota wa 64 bakora impunduka mu kibuga havamo Raphael Valane, Jordan Varetout na Kingsley Coman hinjiramo Mbappe, Adrien Rabiot na William Saliba.

Ikipe y'igihugu y'u Bufaransa ikimara gukora impinduka, yatatse cyane ishaka kwishyura ndetse inahusha uburyo bw'ibitego harimo n'icyahushijwe na Mbappe ku munota wa 88 arekura ishoti riremereye ariko umuzamu arishyira muri koroneri.

Ku munota wa nyuma w'inyongera ikipe y'igihugu y'u Bufaransa yabonye igitego cyo kwishyura gitsinzwe na Griezmann ariko umusifuzi aracyanga.

Umukino warangiye ikipe y'igihugu y'u Bufaransa itsinzwe na Tunisia.

Abakinnyi ba Australia bishimira igitego

Mu wundi mukino nawo wo muri iri tsinda wahuje Denmark na Australia, igice cya mbere cyarangiye rwabuze gica, amakipe yombi anganya 0-0, gusa Denmark ni yo yari yihariye umukino kuko ari nayo yarase ibitego by'inshi. 

Ikipe y'igihugu ya Australia yabonye igitego ku munota wa 60 gitsinzwe na Matthew Leckie ku mupira mwiza yari ahawe na Riley McGree. Umukino warangiye Australia iyoboye n'igitego 1 bituma ihita ibona itike ya 1/8 mu gikombe cy'isi kuko yahise iba 2 mu itsinda D.

Igitego cya Australia cyabahesheje itike ikomeza muri 1/8

Uko amakipe arangije itsinda D ahagaze mu manota

U Bufaransa bufite amanota 6

Australia ifite amanota 6

Tunisia ifite amanota 4

Denmark ifite amanota 1