“Naramuka atinyutse kujyayo, mureke dutegereze turebe" -U Bushinwa bwongeye kuburira Amerika ko Pelosi nakandagira muri Taiwan bibyara amahane

Mu Isi ya dipolomasi hakomeje kwibazwa niba koko Madamu Nancy Pelosi azasimbukira no muri Taiwan muri iyi minsi ari muri Aziya. Ibiro bye nta rujijo byakuyeho kuko byaraye bitangaje ko Pelosi n’intumwa ayoboye bazasura ibihugu bya Aziya nka Singapoure, Malysia, Koreya y'Epfo n' u Buyapani, ariko kuri Taiwan bikaruca bikarumira. 

U Bushinwa ariko bwo ntibwaripfanye kuko bwongeye kwihanagiriza Amerika ko uruzinduko rwa Pelosi muri Taiwan rwabyara akaga gakomeye.  

Umuvugizi wa Minisiteri y’Ububanyi n’Amahanga y’u Bushinwa, Zhao Lijian, yatangaje ko Pelosi aramutse asuye Taiwan "byateza ibibazo bikomeye ndetse n’ingaruka za byo”.  

Zhao yagize ati: "Turashaka kongera kubwira Amerika ko u Bushinwa buhagaze ku ngabo za bwo zitazigera zicara ubusa, kandi u Bushinwa buzafata ibyemezo bikaze ndetse n’ingamba zikomeye zo kurengera ubusugire bwa bwo n’ubw’ibice bya bwo”.

Abajijwe icyo igisirikare cy’u Bushinwa koko cyakora, Zhao yagize ati: “Naramuka atinyutse kujyayo, mureke dutegereze turebe".

U Bushinwa bubona uruzinduko rw’abayobozi ba Amerika muri Taiwan nko kohereza ikimenyetso simusiga gikangurira iki kirwa kwiyomora ku Bushinwa kikagira ubwigenge bwuzuye.  

Uruzinduko rwa Madamu Nancy Pelosi ufatwa nka nimero ya gatatu mu basimbura ba Perezida wa Amerika, akanaba utavuga rumwe n’u Bushinwa w’ibihe byose rubaye  mu gihe umubano wifashe nabi hagati ya Washington na Beijing.

Umurepubulikani Newt Gingrich wayoboye Inteko Nsingamategeko ya Amerika ni we mutegetsi ukomeye waherukaga  gusura Taiwan, hari mu mwaka w’1997.

Mu kiganiro cyaranzwe no kutumvikana abakuru b’ibihugu byombi baherutse kugirana ku murongo wa tefoni, Biden yabwiye Xi ko politiki ya Amerika kuri Taiwan itigeze ihinduka kandi ko Washington irwanya byimazeyo ingamba zinyuranye z’u Bushinwa  zo guhindura uko ibintu bimeze cyangwa guhungabanya amahoro n’umutekano mu gace ka Taiwan.

Kuri uyu wa Mbere Minisitiri w’intebe wa Taiwa, Su Tseng-chang nta bwo yabashije gusubiza mu buryo butaziguye ubwo yari abajijwe niba koko Pelosi azasura iki kirwa ku wa Kane nk’uko ibitangazamakuru byaho byabihwihwisaga. 

Yatangarije abanyamakuru bari i Taipei mu Murwa Mukuru wa Taiwan  ati: "Buri gihe duha ikaze ingendo zigana mu gihugu cyacu no ku bashyitsi b'abanyamahanga".

Src: Reuters