Academy ya PSG mu Rwanda yanyagiye Abafaransa igera ku mukino wa nyuma iza guhuramo na Brazil

Kuri iki cyumweru nibwo amakipe arimo u Rwanda yagarukaga mu kibuga nyuma y'imikino y'umunsi wa wa mbere yari yarangiye nabwo u Rwanda ruyoboye.

Kuri iki cyumweru mu cyiciro cy'abatarengeje imyaka 11 baje gukina umukino wa nyuma mu itsinda C aho bakinnye na Amerika y'Uburasirazuba bayitsinda ibitego 4-3.

Iyi ntsinzi yatumye u Rwanda rukatisha tike ya 1/2 rwaje guhuramo na Brazil, u Rwanda rutsindwa na Brazil ibitego 3-2 bituma rubura amahirwe yo gukina umukino wa nyuma. Kuri uyu wa mbere u Rwanda rurahatanira umwanya wa 3 n'ikipe y'igihugu cya Amerika y'Uburasirazuba ari nawo mu kino wa nyuma kuri iyi kipe.

Mu cyiciro cy'abatarengeje imyaka 13, u Rwanda narwo kuri iki cyumweru rwamanutse mu kibuga aho rwari runayoboye itsinda kuko ku wa gatandatu bari batsinze imikino yabo yose. Kuri iki cyumweru umukino wa mbere bakinnye banyagiye Amerika y'Uburasirazuba ibitego 5-1, umukino wa kabiri unasoza amatsinda banyagira Abafaransa ibitego 3-0 bahita nabona tike ya 1/2 bayoboye itsinda.

U Rwanda mu batarengeje imyaka 13 ruri ku mukino wa nyuma

Mu mikino ya 1/2 u Rwanda rwahise ruhura na Misiri ruyitsinda ibitego 3-1 babona tike yo gukina umukino wa nyuma. Kuri uyu wa mbere u Rwanda rurakina na Brazil ku mukino uza kwerekana ikipe yegukana igikombe mu batarengeje imyaka 13.

Kugeze ubu ikipe y'u Rwanda mu batarengeje imyaka 13 mu mikino 5 imaze gukina yinjije ibitego 21 itsindwa 2 gusa, naho ikipe y'abatarengeje imyaka 11  nabo mu mikino 5 bamaze gukina binjije ibitego 11 batsindwa 6.

U Rwanda ni ubwa mbere rwari rwitabiriye iyi mikino y'igikombe cy'Isi gitegurwa na PSG aho kiri kuba ku nshuro yacyo ya 6, gusa amakipe y'u Rwanda akomeje gutungura benshi kuko mu mpera z'umwaka ushize ari nabwo aba bana bahurijwe hamwe.

Uko imikino yagenze ku munsi w'ejo ndetse n'uko iza gusozwa