RFL
Kigali

Ni gute Karim Benzema abaye rutahizamu ukanga Isi yose?

Yanditswe na: ISHIMWE Olivier Ba
Taliki:14/04/2022 8:47
0


Rutahizamu w'umufaransa Karim Benzema ubu arica agakiza muri Real Madrid nyuma yo kuyiheka ku mugongo akayigeza mu mikino ya 1/2 cya Champions League.



Karim Benzema w'imyaka 34 y'amavuko yageze mu ikipe ya Real Madrid avuye muri Lyon aho byari bimaze kugaragara ko ari umwe muri barutahizamu batanga icyizere mu myaka iri imbere. Real imugura ntiyamwibeshyeho kuko Benzema yagaragazaga ingeso z'ubukubaganyi imbere y'izamu haba muri Lyon ndetse n'ikipe z'u Bufaransa mu bakiri bato.

"Iyo ukinanye n'umuntu ubasha gutsinda ibitego 50 cyangwa 60 mu mwaka w'imikino, bivuze ko hari ibyo uba umufasha kugira ngo atsinde ibyo bitego byose." Karim Benzema aganira n'itangazamakuru. "Nafashe umwanya wo kwiga, ngira byinshi mpindura gusa nyuma yaje kugenda (Ronaldo) nagombaga rero kwerekana ko hari ibyo nshoboye kandi ko nanatanga itandukaniro. Aya magambo yose Karim Benzema yayatangaje nyuma yo kubazwa ku kamaro ke ari kumwe na Cristiano Ronaldo ndetse na nyuma yo gutandukana na we.

Karim Benzema afite impuzandengo y'ibitego 30 kuri buri mwaka w'imikino mu marushanwa yose kuva Cristiano Ronaldo yagenda mu 2018 mu gihe bakiri kumwe yabarirwaga ibitego 20 bisobanuye ko yiyongereyeho ibitego 10. Mu mikino itatu ya Champions League iheruka Karim Benzema yatsinzemo ibitego 7 birimo 4 yatsinze Chelsea bifasha Real Madrid kugera mu mikino ya 1/2 cya Champions League. Benzema yamaze imyaka mu gicucu cya Cristiano Ronaldo byanatumye kuva yagenda amaze gutsinda ibitego 78 mu mikino 132. Ese yabigezeho ate?

Ubuhanga afite mu gutsinda ibitego yaba akoresheje amaguru cyangwa umutwe, biratangaje kuko biri ku rwego rwo hejuru ugereranyije n'uko yari ameze mbere.

Benzema yaranzwe no kwibasirwa cyane ashinjwa kutamenya gutsinda ibitego ndetse Ronaldo akigenda ubwo mu mukino Real Madrid yanganyijemo na Valencia ibitego 2-2 Benzema yahushije uburyo bugera kuri 6 byatumye asohoka mu kibuga abafana bari kumumwaza. Ibyo bibazo byakomeje muri uwo mwaka wose, kuko yatsindaga ibitego 9 biri hasi n'ibyo yabaga yitezweho.

Kimwe mu bintu biri gutuma Benzema ubu amakipe menshi atifuza guhura na we ni ubuhanga afite mu gihe yageze mu rubuga rw'amahina by'umwihariko ari mu gice cy'ibumoso kuko akihagera arindwa mubi. Abibuka neza ubwo Ubufaransa bwatsindaga Espagne ku mukino wa nyuma wa Nations League mu Ukwakira umwaka ushize, icyo gihe Benzema yagize amahirwe yisanga muri uru ruhande afite umupira ahita anyura kuri Cesar Azpilicueta abona nta wundi mukinnyi mugenzi we uhari ahita atera umupira ukomeye Unai Simon atari kugira icyo akoraho.

Karim Benzema yabaye mu gicucu cya Ronardo imyaka isaga 9 yose 

No muri shampiyona ya Espagne, Benzema niko ameze kuko muri uyu mwaka w'imikino, 48% by'imipira amaze gukoraho yabaga ahagaze muri iki igice. Umwaka wa nyuma wa Benzema na Ronaldo (2017-18) Benzema yatsinze ibitego 5 muri shampiyona bingana n'igitego 1 mu minota 431. 2018-19 Benzema yatsinze ibitego 21 bingana n'igitego 1 mu minota 141. 2019-20 Benzema yatsinze ibitego 21 bingana n'igitego kimwe mu minota 190. 2020-21 Benzema yatsinze ibitego 23 bingana n'igitego kimwe mu minota 126. 2021-22 Benzema amaze gutsinda ibitego 24 bingana n'igitego 1 mu minota 93.


Karim Benzema ubwo yerekenwaga muri Real Madrid mu 2009

Karim Benzema kuva yagaruka mu ikipe y'igihugu umwaka ushize nabwo akomeje gutsinda

Vinicuis Junior imwe mu mbunda Karim Benzema ari gukoresha arasa amakipe






TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND