Ibihembo ‘The Choice Awards’ bigiye gutangwa Miss Jolly, Byiringiro Lague na Vestine&Dorcas bayoboye abandi

Ku Cyumweru tariki 13 Werurwe 2022, nibwo hateganyijwe umuhango wo gutanga ibihembo ‘The Choice Awards’ ku nshuro ya kabiri.

Abahatanye bamaze iminsi bahatanye mu cyiciro cy’amatora ari kubera ku rubuga rwa www.thechoicelive.com/awards, cyangwa se ugatora ukoresheje telefoni aho ukanda *544*444* ugashyiramo ‘Code’ y’uwo ushyigikiyeho ugashyiraho # ubundi ugakanda ‘Yes’ [*544*444*Code#].

Amatora yatangiye ku wa 19 Gashyantare 2022, azarangira tariki 12 Werurwe 2022. Gutora inshuro imwe [Ijwi rimwe], bingana n’amafaranga 50 Frw.

Isibo Tv ivuga ko ‘kimwe cya kabiri cy’amafaranga azinjizwa n’umuhanzi cyangwa se undi wese uhatanye muri ibi bihembo binyuze mu matora, azayasubizwa hanyuma andi akoreshwe mu itegurwa ry’iki gikorwa’.

Ibi bihembo bigiye gutangwa ku nshuro ya kabiri, aho bigizwe n’ibyiciro 13 harimo n’igihembo cyiswe ‘Icon Award’, kizahabwa uwitangiye umuziki akazatangazwa ku munsi w’ibihembo.

Muri ibi bihembo harimo ibyiciro byakuwemo ibindi byongerwamo, mu rwego rwo kubinoza neza.

Ibihembo bya ‘The Choice Awards’ ni ngarukamwaka, bitegurwa n’ikipe ngari y’abanyamakuru bakora ikiganiro ‘The Choice Live’, kimwe mu biganiro bikunzwe kuri Televiziyo Isibo.

Bifite intego yo gushyigikira urugendo rw’umuziki w’u Rwanda, gutera imbaraga abahanzi no kubashimira ibyo bamaze gukora mu ruganda rw’imyidagaduro.

Amajwi yafashwe kuri iki Cyumweru tariki 6 Werurwe 2022, agaragaza ko mu cyiciro 'The Most Valuable Player' umukinnyi Byiringiro Lague ari we ufite amajwi menshi aho agejeje 586, agakurikirwa na Mutabazi Yves ufite amajwi 144.

Umuhanzikazi Marina ayoboye abandi mu cyiciro 'The Choice Female Artist of the year' aho afite amajwi 286, agakurikirwa na Alyn Sano ufite amajwi 161.

Niyo Bosco ari imbere mu majwi mu cyiciro 'The Choice Male Artist of the year' aho afite amajwi 683, agakurikirwa na Meddy ufite amajwi 75.

Fayzo Pro ni we wa mbere mu cyiciro 'The Choice Video Director of the year' ku majwi 1033, agakurikirwa na Oskados Oskar ufite amajwi 784.

Kenny Sol ari imbere mu majwi mu cyiciro 'The Choice Video of the year' aho afite amajwi 201, agakurikirwa na 'My Vow' ya Meddy ifite amajwi 20.

Umukinnyi wa filime Bijoux ayoboye mu cyiciro 'The Choice Actress of the year' aho afite amajwi 1160, agakurikirwa na 'Kecapu' ufite amajwi 350.

Mu cyiciro 'The Choice Actor of the year' Digidigi ni we uri imbere aho agejeje amajwi 860, agakurikirwa na 'Papa Sava' ufite amajwi 322.

Jojo Beez ayoboye bagenzi be mu cyiciro 'The Choice Dancer of the year' n'amajwi 140, agakurikirwa na Jordan Kallas ufite amajwi 133.

Mutesi Jolly wabaye Nyampinga w'u Rwanda 2016, ayoboye bagenzi be mu cyiciro 'The Choice Influencer of the year' ku majwi 2020, agakurikirwa na Rock Kirabiranya ufite amajwi 2006.

Dj RY ukorera Ikigo cy'Igihugu cy'Itangazamakuru (RBA) ni we uyoboye bagenzi be mu cyiciro 'The Choice Dj of the year' aho afite amajwi 567, agakurikirwa na Dj Brianne ufite amajwi 347.

Chris Eazy ayoboye bagenzi be mu cyiciro 'The Choice New Artist of the year' aho afite amajwi 429, agakurikirwa na Confy ufite amajwi 119.

Mu cyiciro 'The Choice Fashion Designer' Joyce Fashion Designer ni we uri imbere mu majwi aho afite 415, agakurikirwa na Tanga Design ufite amajwi 263.

Vestine&Dorcas bayoboye abandi mu cyiciro 'The Choice Gospel artist of the year' aho bafite amajwi 1086, bagakurikirwa na Serge Iyamuremye ufite amajwi 281.

Mutesi Jolly wabaye Nyampinga w'u Rwanda 2016 ayoboye bagenzi be mu cyiciro ‘'The Choice Influencer of the year' 

Itsinda rya Vestine& Dorcas ryamamaye mu ndirimbo ‘Papa’ bayoboye abandi mu cyiciro 'The Choice Gospel artist of the year’   

Mu cyiciro 'The Most Valuable Player', umukinnyi Byiringiro Lague ni we ufite amajwi menshi aho agejeje 586