Winnie Nwagi yahagaritse igitaramo yari afite i Dubai bitunguranye

Winnie Nwagi, icyamamare muri muzika ya Uganda, yagombaga gutaramira i Dubai mu gitaramo cyari cyateguwe na Kats Promotions, ariko atunguranye ntiyacyitabira. Iki cyemezo cyatumye abateguye igitaramo n’abari biteguye kugitabira batungurwa ndetse barakazwa.

Nwagi, uzwi mu ndirimbo nka Matala, Okubye Nyo, Jangu n’izindi, yari afite gahunda yo gutaramira mu kabyiniro ka Venom Club i Dubai  ejo ku wa Gatandatu, tariki ya 1 Gashyantare 2025.

Nk’uko amakuru abitangaza, viza ye yari yarabonetse ku gihe, ndetse yari gutwarwa n’indege ku mugoroba wo ku wa Kane. Gusa ntiyigeze agera ku kibuga cy’indege ngo afate urugendo, bikaba byateye impagarara ku bateguye igitaramo, cyane ko byasaga n’aho byose byari byatunganye.

Kugeza ubu, nta mpamvu yatangajwe na Nwagi cyangwa abamufasha mu muziki bo muri Swangz Avenue ku cyatumye atitabira igitaramo cye.

Kats Promotions yatangaje ko ibabajwe cyane n'ukuntu igitaramo cyapfuye, dore ko byanateje igihombo ku bahanzi n’abafana bari biteguye. Yagaragaje ko itishimiye imyitwarire y’uyu muhanzikazi ndetse n’itsinda bakorana, kuko byose byari byateguwe hasigaye gusa we nk'uko tubikesha mbu.ug.

Kugeza ubu, haracyari urujijo ku cyemezo yafashe, ndetse ntibiramenyekana niba igitaramo kizakomeza hakajyaho undi muhanzi cyangwa niba abafana bari bamaze kwishyura amatike bazasubizwa amafaranga yabo.

Winnie Nwagi yahagaritse igitaramo yari kuzakorera I Dubai, ejo tariki 1 Gashyantare 2025