CAN 2021: Inzu ya Kamara wa Sierra Leone irinzwe na polisi nyuma yuko ahushije penaliti

Inzu ya Kamara iri mu murwa mukuru Freetown yibasiwe nyuma yuko Sierra Leone itsinzwe uwo mukino wabereye i Limbe, ku gitego 1-0, byatumye isezererwa mu irushanwa.

Iyo Kamara aza gutsinda iyo penaliti, birashoboka ko ikipe ye yari kunganya muri uwo mukino, bigatuma ikomeza mu mikino yua 1/8.

Uwungirije umuyobozi ushinzwe itangazamakuru muri polisi ya Sierra Leone yabwiye BBC Sport Africa ati:"Nshobora kwemeza ko polisi ikiri ku nzu ya Kei Kamara mu rwego rwo kuyirinda urubyiruko rwarubiye rutishimye kuko yahushije penaliti ku mukino na Equatorial Guinea".

"Polisi ya Sierra Leone nk'urwego rwibanda cyane ku kuburizamo ibyaha bitaraba yabonye amakuru y'ubutasi asobanura ko urubyiruko rwarakaye rwashakaga gutera inzu ye nuko dufata icyemezo cyo kujya ku nzu na mbere yuko umukino urangira".

"Turabizi ibyabaye kuri Umaru Bangura mu myaka micye ishize, rero twahisemo gukumira icyaha kitaraba".

Aho yakomozaga ku wahoze ari kapiteni w'iyi kipe, inzu ye yateweho amabuye nyuma yuko na we ahushije penaliti mu bihe by'ingenzi, icyo gihe hari mu minota y'inyongera ku mukino na Liberia w'amajonjora yo gushaka itike y'igikombe cy'Isi cya 2022.

Polisi yongeyeho ko "nta kwangiza kwakozwe" ku nzu ya Kamara kandi ko "urubyiruko ruri muri aka gace rurimo kumvikana na twe".

Kamara, wahoze ari rutahizamu wa Norwich City na Middlesbrough, nta cyo aratangaza ku kuba abapolisi bagabwe ku rugo rwe.