Brazil yongeye gukorera amateka akomeye mu Buyapani nyuma y’imyaka 19

Ku wa Gatandatu tariki ya 07 Kanama 2021, nibwo hakinwe umukino wa nyuma mu mikino Olempike 2020, warangiye ku ntsinzi ya Brazil imbere ya Espagne, bituma ubutaka bw’u Buyapani bukomeza kubera butagatifu ku banya-Brazil.

Ni umukino wari ukomeye cyane, wakinwe iminota 120 kugira ngo hagaragare ikipe yegukanye intsinzi, nyuma y’uko iminota 90 isanzwe y’umukino rwari rwabuze gica.

Malcom w’imyaka 24 winjiye mu kibuga asimbuye, niwe watsinze igitego cy’intsinzi ku ruhande rwa Brazil ku munota wa 108 ku mupira yahawe na Antony gisanga icyatsinzwe na Matheus Cunha, bituma Brazil isoza umukino itsinze Espagne ibitego 2-1.

Uyu mukino wabereye n’ubundi mu mujyi wa Yokohama, ahabereye umukino wa nyuma Brazil yegukanyemo igikombe cy’Isi mu 2002.

Byasabye imyaka 64 kugira ngo Brazil yegukane umudali wa mbere wa zahabu mu mikino Olempike. Uyu ubaye umudali wa kabiri wa zahabu iki gihugu cyegukanye mu mikino Olempike hakaba hari hashize imyaka itanu yegukanye umudari wa mbere (nyuma y’imyaka 64 itarawegukana).

Muri rusange Brazil yegukanye imidali 21 mu mikino Olempike y’uyu mwaka,  irimo irindwi ya zahabu.

Brazil yatsinze Espagne ku mukino wa nyuma ibitego 2-1

Brazil yakuye umudali wa zahabu mu Buyapani nyuma yo kuhakura igikombe cy'Isi mu 2002