Emmy Pro na Dieudonné Mure bakoranye indirimbo ‘Indabo za Mariya’ yamamaye muri Kiliziya Gatolika-VIDEO

Emmy Pro yihariye mu gutunganya no gukorana n’abahanzi b’umuziki w’indirimbo zihimbaza Imana by’umwihariko abo muri Kiliziya Gatolika. Anazwiho guhuriza abahanzi bakomeye mu ndirimbo imwe.

Uyu musore wakoze indirimbo nka ‘Mana idukunda’ yahuje imbaraga n’umuhanzi Dieudonne Mure bamaze iminsi bakorana mu gutunganya indirimbo muri studio ya Universal Records.

KANDA HANO WUMVE INDIRIMBO ‘INDABO ZA MARIYA’ YA EMMY PRO NA DIEUDONNE MURE

Indirimbo ‘Indabo za Mariya’ bavuguruye yamenyekanye cyane muri Kiliziya Gatolika kubera ubutumwa budasanzwe buyikubiyemo n’umudiho ugize inyikirizo yayo.

Abakirisitu bo mu ma Paruwasi atandukanye kubera kuryoherwa n’iyi ndirimbo bahabwa ingabire mu gihe bayiririmba bakongeraho ibitero bishya byabo nk’uko aba batunganya umuziki babidutangarije.

Bagira bati “Umubyeyi ukwiye kubyinirwa no kuririmbirwa, ubwe atubonekera i Kibeho yatwibwiriye ko turi indabo ze, asaba Alphonsine na Anatalie guhora bazuhira.”

Emmy Pro na Dieudonné Mure bavuze ko bakoze basubiyemo iyi ndirimbo kugira ngo bafashe benshi gususuruka muri ibi bihe Isi yugarijwe na Covid-19.

Ati “Nubwo turi mu bihe bikomeye kandi bitoroshye, ntidushaka kwicisha abakunzi b’ibihangano irungu ariyo mpamvu twahisemo kubategurira iyi ndirimbo kugira ngo bizihirwe no muri ibi bihe.”

Emmy pro, ukorera muri Universal Records, yatunganije indirimbo benshi bakunze zirimo ‘Mana idukunda byahebuje’, ‘Niyeguriye Nyagasani’ na ‘Twaje Mana yacu’, yahurijemo ibyamamare baba abo muri kiliziya no hanze yayo, harimo Catholic all stars ubwe yishingiye, Mani Martin, n’abandi baririmbyi bo mu ma korali akomeye kandi agezweho.

Ku bw’ubuhanga n’ubusirimu izi ndirimbo zikoranywe, byatumye zirebwa n’abantu barenga miliyoni ebyiri kuri shene ya Youtube, ndetse zitwara n’ibihembo birimo n’icya “Pacis TV Gospel Talent Show cya 2020.”

Dieudonné Mure atunganya umuziki muri Universal Records, asanzwe amenyerewe nk’umucuranzi wa Chorale de Kigali, umwanditsi w’indirimbo, umuhanzi ndetse n’utoza amajwi akanayobora indirimbo.

Uyu musore ni we wayoboye igitaramo cya Chorale de Kigali “Christmas Carols concert” cyabereye muri Kigali Arena.

Anafasha abahanzi bagana iyi kompanyi mu kubagira inama mu gihe bakora indirimbo dore ko anazitunganya koko. Ubu akaba ari umunyeshuri muri Kaminuza y’u Rwanda.

Amashusho y’iyi ndirimbo ‘Indabo za Mayira’ yatunganijwe na Aime Pride usanzwe na we atunganya amashusho muri Universal Records wakoze amashusho y’indirimbo zirimo ‘Mana idukunda byahebuje’, ‘Twaje Mana yacu’, ‘Niyeguriye Nyagasani’ ndetse n’izindi zaba izihimbiwe gusingiza no guhimbaza Imana, n’izindi zivuga ubuzima busanzwe.

Emmy Pro na Dieudonné Mure [Ubanza ibumoso] basubiyemo indirimbo ‘Indabo za Mariya’ yamamaye muri Kiliziya Gatolika

 

Umuhanzi Dieudonné Mure usanzwe atunganya amajwi y’indirimbo z’abahanzi batandukanye

Amashusho y’iyi ndirimbo yafatiwe muri studio ya kompanyi ya Ishusho Ltd ikuriwe na Muyoboke Alex umujyanama w’umuhanzi Chris Hat

KANDA HANO UREBE AMASHUSHO Y’INDIRIMBO ‘INDABO ZA MARIYA’ YA EMMY PRO NA DIEUDONNE MURE

">