Ibintu 5 bikomeye M.Irene yakoreye Vestine na Dorcas, bishakiwe agaciro byahenda cyane

Ibi byose ariko bisaba igiciro ndetse n’ikiguzi gikomeye kugira ngo bigerweho mu ruganda rwa muziki cyane ko umuntu wifuza ubwamamare muri muzika ntabwo ariwe gusa uba uri muri iki kibuga kuko aba ahanganye n’abandi batandukanye kandi nabo baba bifuza kuzamura urwego rwabo.

Vestine na Dorcas batandukanye na M.Irene wari Manager wabo

Ubundi umuziki abawurimo n’abawukora bakubwira ko uhenda cyane ndetse ko ibaye itari impano ntabwo wapfa kuwisukira uko wibonye. Nanone kandi impano hari benshi bayifite babuze aho bamenera kugira ngo babe bakumvikana kandi bahora babwirwa ko bafite iyo mpano. 

Ingero zirahari cyane kandi ntibisaba kuba ufite amafaranga cyangwa utayafite. Ku ruhande rumwe hari abahanzi benshi cyane bamaze imyaka irenga 10 mu muziki ariko ntawe ubazi nyamara ntako batagira ngo basohore indirimbo ndetse zanakundwa ariko uburyo bakoramo ibintu byabo ndetse na poromosiyo ntibikorwe ku rwego rwatuma bamamara.

Ku rundi ruhande hari abandi bahanzi bafite buri kimwe, yaba impano ndetse n’amafaranga ariko umuziki warabananiye ndetse barabuze aho bipfira cyane ko iyo uganiriye nabo bakubwira ko ntacyo batakoze kugira ngo bazamure urwego rw’umuziki wabo ariko bikanga.

Hari ku itariki 2 Nyakanga 2020 ubwo abahanzikazi Vestine na Dorcas bafunguraga shene ya YouTube, gusa mu kuyifunguza nk'uko abazi uko YouTube ikora bazi ko hari ibisabwa kugira ngo urubuga runaka rutangire kwishyurwa.

Aba bahanzi bayifungura babonye batabivamo bahitamo gufata inzira igana i Kigali baza kwamamaza iyi shene yabo nshya bari bafunguye, muri uko kuyamamaza nibwo bageze kuri Murindahabi Irene yiyemeza kubafasha na cyane ko ahorana umutima wo gufasha ndetse akaba yarazamuye impano zitari nke.

Mu kubabona yifuje kubafasha no kubamenyera buri kimwe nk’uko abyivugira ndetse akabishyurira n’amashuri, akabamenyera uburyo bwo kugenda, imyambaro yabo, byose byari mu biganza bya Murindahabi Irene.

Kugeza ubu iyi shene yabo ya Youtube ifite abantu bamaze kureba indirimbo zabo (Views) barenga miliyoni 5, ibintu benshi bita ko ari amateka akomeye aba bana batari kuzigezaho mu gihe icyari cyo cyose Irene Murindahabi atari kubafata ngo atangire kubamenyekanisha.

Nka Inyarwanda twakusanyije ibintu 5 bigaragara ndetse bifatika Umunyamakuru Irene Murindahabi yakoze kugira ngo izina rya Vestine na Dorcas ribe rizwi kugera kuri uru rwego.

1. Vestne na Dorcas ni bamwe mu nkingi za mwamba mu muziki wo kuramya no guhimbaza Imana: Ni ibintu bigaragara cyane mu buryo ubwo aribwo bwose mu bakurikiranira hafi umuziki wo kuramya no guhimbaza Imana bakubwira ko aba bana ari impano Imano yizaniye ku isi cyane cyane iyo urebye n’uburyo indirimbo zabo zahoraga mu matwi y’abanyarwanda. Ibi byose ubiri inyuma na Irene wabinjije mu muziki. Kwandika indirimbo, kuyitunganya, kuyamamaza, ni ibintu bihenze cyane. Niyo Bosco wanditse indirimbo z'aba bakobwa, we yivugira ko yagakwiye kwishyurwa 800,000 Frw ku ndirimbo imwe gusa.

2.  Vestine na Dorcas bishyurirwaga amashuri: Umunyamakuru M.Irene yavuze ko afite ibihamya bigaragaza amafaranga yose yatanze kuri aba bakobwa kuva mu 2020, kandi anabifite ibigaragaza amafaranga Youtube yishyuye cyane ko yishyuriraga n’aba bana amashuri akanabambika. M.Irene yafataga ku mafaranga yishyuwe na YouTube akishyurira Vestine na Dorcas amafaranga y'ishuri nk'uko abitangaza ndetse n'aba bana bumvikanye bavuga ko iyo umwe yarwaraga, M.Irene yamuvuzaga. 

3.  Vestine na Dorcas bari bageze ku rwego rwo gutumirwa mu bitaramo bikomeye n’abandi bahanzi bakuru: Si rimwe si kabiri aba bahanzikazi bagiye batumirwa mu bitaramo bitandukanye bimwe byanagiye bisubikwa kubera icyorezo, ndetse no ku mateleviziyo atandukanye kandi yishimiye no kubakira. Hari n'amakuru ahari avuga ko bafite ubutumire bwo kuririmba ku mugabane wa Amerika. Ibi byose ni umusaruro wa M.Irene. 

4.    Nahawe Ijambo na Papa ni indirimbo zitazibarirana mu mateka y’umuziki wo kuramya no guhimbaza Imana: Ni ubwa mbere hari habonetse abana bato mu  Rwanda bakabasha kuzuza miliyoni ku gihangano cy’ababashije kukireba ndetse babikora bikurikiranya mu buryo bwose kandi ari abantu batari bafite izina rihambaye mu muziki ahubwo ari imbaraga za Irene wagiye akora poromosiyo yo ku rwego rwo hejuru.

5.    Murindahabi Irene, Izina rya Vestine na Dorcas riratumbagira: Ubu inkuru iyoboye ibitangazamakuru bitandukanye ni ugutandukana kwa Vestine na Dorcas n’uwari umujyanama wabo M.Irene, ibi byo ubwabyo biri kuvugwa ku rwego rungana gutya mu gihugu cyose birakwereka urwego aba bana bashyizweho na M.Irene. 

N'ubwo byanatijwe umurindi n'inkuru yababaje benshi yo kugambanira M.Irene aho hatungwa agatoki Mike Karangwa na Aimable utegura Rwanda Gospel Stars Live, ariko kumva gusa ko M.Irene yatandukanye n'aba banyempano byababaje benshi bitigisa imbuga nkoranyambaga. Niwitegereza abandi bahanzi batandukanye na ba Manager babo, urasanga iyo nkuru itaravuzwe cyane nk'iyi ya M.Irene, ibi bivuze ko M.Irene hari akazi gakomeye yakoze.

Ku itariki 8 Nyakanga 2021 M Irene yakoze ikiganiro gitunganyije cy'amashusho yanyujije kuri shene ye ya Label yise MIE Empire. Ni ikiganiro yavugiyemo byinshi n'ibihato byagejeje ku iherezo ry'imikoranire itari mu nyandiko yari afitanye n'abahanzikazi Vestine na Dorcas yinjije mu muziki mu 2020.

Umwaka umwe yari amaranye n’aba bahanzikazi mu ndirimbo zihimbaza Imana, awusobanura nk’umwaka udasanzwe ariko kandi watumye ashyira mu bikorwa ibyo yize muri Kaminuza y’u Rwanda n’ubundi bumenyi yagiye yunguka mu kibuga cy’imyidagaduro.

Ni umwaka avuga ko urangiye mu buryo atashakaga, ariko kandi urimo byinshi byo kwishimira birimo indirimbo yakoreye aba bahanzikazi zanditswe na Niyo Bosco, umubare w’abakurikira Shene ya Youtube ya Vestine Dorcas wikubye hafi inshuro 90 n’ibindi.