EXCLUSIVE: Eric Rutanga yadutangarije byinshi birimo n'ukuri kweruye ku igurishwa rye muri Yanga Africans-VIDEO

Mu mwaka w’imikino ushize Yanga Africans yo mu cyiciro cya mbere muri Tanzania yifuje myugariro ukinira Rayon Sports Rutanga Eric, ariko isoko ryo kugura abakinnyi rifungwa ntagikozwe hagati y’impande zombi.

Yanga yaguze undi mukinnyi wo gukina ku ruhande rw’ibumoso yugarira ariko ntiyahirwa n’iyi kipe ngo atange ibyo abafana baba bamutezeho, byanatumye bongera kugumuka batangiza gahunda yo kugarura izina rya Rutanga  Eric muri Yanga Africans.

Ibi bigaragarira ku mbuga nkoranyambaga z’iyi kipe, aho bahora bamuha ikaze muri Yanga, yatsinda igitego bakamushyira ku nkuta zabo bishimana nawe ku ntsinzi yabonye ariko bagasoza n’ubundi bamuha ikaze mu ikipe yabo.

Ibi byakanguye abantu benshi batandukanye batangira gutekereza ko ibintu bishobora kuba bigeze kure gusa ariko Rutanga Eric avuga ko nawe ubwe abyumva bivugwa ariko atari ukuri kuko byabaye ubuyobozi bwa Rayon Sport bwabimumenyesha, yongeraho ko we nta burenganzira afite bwo kuganira na Yanga kuko ari umukinnyi wa Rayon Sports uyifitiye amasezerano y’imyaka ibiri.

Ubuyobozi bwa Yanga Africans bwigeze kugirana ibiganiro n’ubuyobozi bwa Rayon Sports ku igurwa rya Rutanga  ariko ntacyo byatanze.

Inyarwanda.com iganira na Rutanga Eric yashimangiye ko amakuru amuvugwaho yo kujya muri Yanga ari ibihuha nta kuri kurimo avuga ko arajwe ishinga n’imikino ya shampiyona ikipe abereye kapiteni iri kwitegura.

Yagize ati”Ibyo kujya muri Yanga biri kuvugwa ni ibihuha kuko ubwange sinigeze mvugana n’ubuyobozi bwa Yanga ndetse n’abayobozi banjye ntibigeze bavugana, narabyutse nanjye mbyumva gutyo bavuga ko nasinye muri Yanga. Ubu ikituraje ishinga ni imikino ya shampiyona turi kwitegura ya Mukura VS na APR FC, ibindi ntabihari.”

Yanga Africans bivugwa ko yifuza gusinyisha Rutanga mbere yuko isoko ryo kugura no kugurisha abakinnyi rifungwa muri uku kwezi kwa 12, iravugwamo ubukene bukabije bwanatumye abakinnyi bayo batangira kuyivamo bakagenda.

Rutanga Eric avuga ko ari umukinnyi wa Rayon Sports atigeze avugana na Yanga Africans

Kanda hano urebe ikiganiro kirambuye na Rutanga

VIDEO: Eric Niyonkuru-InyaRwanda.com