RFL
Kigali

Muhammadu Buhari wongeye gutorerwa kuyobora Nigeria ahigitse abakandida barenga 70 ni muntu ki ?

Yanditswe na: Yvonne Murekatete
Taliki:6/03/2019 12:27
0


Taliki ya 27 Gashyantare 2019 , ni bwo ibyavuye mu matora y'abanya-Nigeriya byagaragaje ko Muhammadu Buhari yongeye gutsindira intebe y'umukuru w'igihugu binyuze mu matora. Reka turebere hamwe bimwe mu byaranze ubuzima bwa politiki bwe.



Muhammadu Buhari yavutse kuwa 17 Ukuboza 1942 i Daura muri Leta ya Katsina iherereye mu Majyaruguru ya Nigeria hafi n’umupaka w’igihugu cya Tchad. Ni umuhererezi mu muryango w’abana 23, yashatse abagore babiri, abyara abana 10.

Bumwe mu buzima bw'ingenzi bwa Muhammadu Buhari muri politiki

Ku myaka 19 Muhammadu Buhari yagiye mu gisirikare, mu 1980 aba umusirikare mukuru mu ngabo za Nigeria. Perezida Muhammadu Buhari kuri ubu ni umusirikare ufite ipeti rya Jenerali Majoro ndetse yayoboye Nigeria amezi 20 guhera mu Ugushyingo 1983 nyuma ya ‘coup d’état’ yarangije Repubulika ya kabiri, gusa nawe yaje guhirikwa na Generali Ibrahim Babangida muri Kanama 1985.

Mu 1983, Perezida Buhari yafashe ubutegetsi ahiritse Perezida Shehu Shagri watowe mu 1979. Ubutegetsi bwe ntibwarambye kuko mu 1985 yakuweho na Gen. (General) Ibrahim Babangida. Mu mezi 20 yayoboye, yaranzwe no gufunga abantu benshi, barimo umunyamuzika Fela Kuti wavumbuye injyana ya Afrobeat, anahonyora uburenganzira bwa muntu.

Buhari yiyamamarije kuyobora igihugu cya Nijeriya inshuro eshatu zose ariko agatsindwa amatora. Yiyamamaje mu mwaka wa 2003, 2007 ndetse na 2011. Kuri iyi nshuro rero mu mwaka 2015 yegukanye instinzi.

Mu 2003, Perezida Buhari yiyamamaje mu matora y’umukuru w’igihugu atsindwa na Olusegun Obasanjo, mu 2007 na 2011 ntiyabasha gutsinda Umaru Yar’Adua na Goodluck Jonathan.

Mu 2011 gutsindwa kwe kwakurikiwe n’imvururu zahitanye ubuzima bw’abantu muri Nigeria. Mu 2014 Muhammadu Buhari yatanzweho umukandida n’ihuriro ry’amashyaka atavuga rumwe n’ubutegetsi muri Nigeria (APC), atsinze Atiku Abubakar bari bahanganye.

Buhari yongeye gutorerwa kuyobora Nigeria muri 2015. Abamushyigikiye bemeza ko muri manda ye ya mbere yagerageje kurwanya ruswa n’umutwe w’iterabwoba wa Boko Haram.

Perezida Buhari ni we wa mbere utavuga rumwe n’ubutegetsi ubashije gutsinda uwari ku butegetsi. Ku nshuro ya kane yiyamamariza kuba umukuru w’igihugu, yagize amahirwe yo gutoranywa ngo ahagararire ihuriro ry’amashyaka atavuga rumwe n’ubutegetsi (All progressives Congress, APC).

Nyuma y'imyaka 3 taliki ya 27 Gashyantare Perezida Buhari yongeye gutorerwa kuyobora Nigeria mu bwiganze bw'amajwi ahigitse abandi bakandida barenga 70 bari bahanganye. Intsinzi ya perezida Buhari yishimiye n'abakuru b'ibihugu batari bacye barimo na Perezida w'u Bushinwa Xi JinPing ndetse na Perezida w'u Rwanda Paul Kagame abinyujije ku rukuta rwe rwa twitter.






TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND