Basketball: Nate ufite inkomoko mu Rwanda yakoze inkweto zihariye mu kuruha icyubahiro -AMAFOTO

Uyu musore w’imyaka 17, avuka kuri nyina w’Umunyarwandakazi na se w’Umunyamerika, akaba ari umwe mu bakinnyi basigaye bitezwe cyane mu mukino wa Basketball. Abasesenguzi benshi bamubona nk’umukinnyi uzaba mu ba mbere bazatoranywa mu irushanwa rya NBA mu mwaka wa 2026.

Mu gihe gito amaze muri Basketball, Ament yamaze kugirana amasezerano y’igihe kirekire n’uruganda rwa Reebok, rumaze kwamamara ku isi mu gukora inkweto n’imyenda y’imikino. Ubu rero, yahimbye inkweto ze bwite, izina rya “Rwanda PE”, zirimo ibirango n’ibara by’Ibendera ry’u Rwanda, ziba icyubahiro yahaye igihugu akomokamo.

Mu kiganiro yagiranye na Times Sport, Nate Ament yavuze ko yahisemo ko inkweto ze za mbere ziba izitanga icyubahiro kuri nyina ndetse n’u Rwanda rwamubyaye mu buryo bw’amaraso.

Yagize ati: “Mama wanjye ni Umunyarwandakazi kandi igihugu cy’u Rwanda gifite agaciro gakomeye kuri njye. Ni we wanteye ishyaka ryo gukina Basketball, ni yo mpamvu nifuje ko inkweto zanjye za mbere zaba izo kumuha icyubahiro. Ibendera ry’u Rwanda rifite amabara meza cyane kandi ryuzuye ubwiza, byari igitekerezo cyoroshye rwose.”

Nate yavuze ko gukora izi nkweto byari urugendo rw’ishyaka n’ubwitange. Yagize ati: “Twicaye amasaha menshi hamwe n’abavandimwe banjye n’umushushanyi, dukora amahitamo menshi atandukanye. Twagerageje ubwoko bw’inkweto bugera ku 100 mbere yo kwemeza inziza. Ibyo ni byo byatumye dukora inkweto zifite ishusho n’amarangamutima.”

Izi nkweto zifite ibimenyetso bidasanzwe birimo izuba riri ku kagombambari (heel), ibendera ry’u Rwanda ku rurimi rwazo, ndetse n’amabara yegeranyijwe neza ku musego wo hepfo, byose bikagaragaza aho umutima wa Nate akunda u Rwanda.

“Inkweto ndazikunda cyane kuko zifite ikimenyetso cyanjye bwite. Ariko ikinshimisha kurushaho ni ukuntu zerekana igihugu cya mama wanjye, n’uko bigaragaza uwo ndi we.”

Nate kandi avuga ko atifuza ko izi nkweto zikoreshwa gusa n’abakinnyi. Anifuza kuzigerageza no ku myambaro isanzwe yo hanze y’imikino. Uretse ibyo, atangaza ko ari gutegura urugendo rwo kuza mu Rwanda mu mpeshyi ya 2025.

Ati“Ndifuza kuza kureba uko ibintu bihagaze mu Rwanda, nkamenya aho natera inkunga. Ndashaka no kongera guhura n’umuryango wanjye.”

Ament anatangaza ko hari imishinga iri gutegurwa izamuhuza na Shampiyona ya Basketball mu Rwanda (RBL), aho ashaka kugira uruhare mu kuzamura impano nshya.

Nate Ament yakoze inkweto yo guha icyubahiro u Rwanda nk'igihugu mamawe akomokamo