Jean-Claude Van Damme arashinjwa gusambanya abakobwa bacurujwe

Nk’uko byatangajwe na CNN, Ikigo gikora iperereza no kugenza ibyaha n’iterabwoba muri Romania cyitwa DIICOT cyamaze gutanga ikirego kivuga ko Jean-Claude Van Damme yaryamanye n’abakobwa batanu b’abanya-Romania bagurishijwe n’itsinda ry’abanyabyaha bikekwa ko riyobowe n’uwitwa Morel Bolea usanzwe ari umucuruzi.

Ibi bivugwa ko byabereye mu mujyi wa Cannes uherereye mu Bufaransa, aho aba bakobwa batanu Van Damme yabahawe nk’impano mu birori yari yateguye, gusa ntihavugwa igihe cya nyacyo ibyo birori ndetse n’ibyo bikorwa byabereye.

Umunyamategeko witwa Adrian Cuculis uhagarariye umwe muri abo bakobwa, yatangaje ko muri ibyo bikorwa abo bakobwa bahohotewe ndetse bakaba baragurishijwe atari ibintu bakoze kuko babishaka.

Aganira na CNN yagize ati:”Igihe kimwe muri Cannes, ibirori byateguwe na Jean-Claude Van Damme, abanya-Romania bari gukorwaho iperereza ku kuba barashinze itsinda ry’abagizi ba nabi bahaye Jean-Claude Van Damme abakobwa batanu b’abanya-Romania ngo baryamane.

”Uwakiriye abakobwa yari azi ibihe barimo. Nk’uko umutangabuhamya abivuga, Jean-Claude Van Damme yari abizi neza ko abo bakobwa bacuruzwa batabikoze ku bushake bwabo.”

Kugeza ubu abahagarariye Jean-Claude Van Damme mu mategeko ntabwo baragira icyo bavuga kuri ibi uyu mugabo w’imyaka 64 ashinjwa, gusa abakora iperereza bo barakomeje.