Dangote aracyayoboye! Ubutunzi bw’abaherwe 22 ba Afurika bwageze kuri Miliyari 105$

Iyi ntambwe Dangote yayigezeho ahanini abikesheje imishinga ikomeye afite irimo n'uw'uruganda rwa Dangote Refinery rwatangijwe mu mwaka ushize mu nkengero za Lagos. Ubutunzi bwe bugaragaza neza uburyo ubucuruzi bwa Dangote, cyane cyane mu nganda za peteroli, isukari, n’ubucukuzi bw’amabuye y’agaciro, bwabaye intangarugero ku rwego rwa Afurika.

Ku mwanya wa kabiri mu rutonde rwa Forbes rw’abaherwe bo muri Afurika mu 2025, haza Johann Rupert n'umuryango we bo muri Afurika y’Epfo batunze miliyari 14$. Ubutunzi bwa Johann Rupert bwiyongereyeho 39% kubera imigendekere myiza y'ubucuruzi akorana bugendanye n'imyambarire.

Nicky Oppenheimer n'umuryango we bo muri Afurika y’Epfo ni bo bari ku mwanya wa gatatu, bakaba bafite ubutunzi bungana na miliyari 10.4$. Oppenheimer azwi cyane mu bucukuzi bw’amabuye y’agaciro.

Mu bandi baherwe baje kuri uru rutonde harimo Nassef Sawiris wo mu Misiri ufite miliyari 9.6$, Mike Adenuga wo muri Nigeria ufite miliyari 6.8$, na Abdulsamad Rabiu wo muri Nigeria utunze miliyari 5.1$. Naguib Sawiris wo mu Misiri utunze miliyari 5$, na we ari ku rutonde rw’abantu bakomeye muri Afurika.

Ku rutonde rwa Forbes rw’abantu bakize muri Afurika kandi, hagaragaraho Koos Bekker utunze miliyari 3.4$ ndetse na Mohamed Mansour ufite miliyari 3.4$, bakomoka muri Afurika y’Epfo na Misiri. Patrice Motsepe wo muri Afurika y’Epfo, ufite miliyari 3$, na Issad Rebrab wo muri Algeria ufite miliyari 3$, na bo baza mu myanya ya mbere y'abatunze agatubutse kuri uyu mugabane.

Muri rusange, Forbes yagaragaje ko ubutunzi bw’abaherwe 22 bo muri Afurika bwiyongereye bukagera kuri miliyari 105$, buvuye kuri miliyari 82.4$ bwariho mu mwaka ushize. Ku rutonde rw'uyu mwaka, Afurika y’Epfo irayoboye kuko ifiteho abaherwe 7, ikurikiwe na Nigeria na Misiri bifiteho abaherwe 4, na Maroc ifiteho abaherwe 3.

Dore urutonde rwa Forbes rw’abaherwe 22 ba mbere batunze agatubutse muri Afurika mu 2025: