Umutwe wa M23, ukorera mu Burasirazuba bwa Repubulika Iharanira Demokrasi ya Kongo (DRC), uvuga ko wiyemeje korohereza ingabo z'Umuryango w'Ibihugu bya Afurika y'Amajyepfo (SADC) gusubira iwabo, nyuma y'amezi abiri wari umaze ufashe Umujyi wa Goma.
Mu itangazo ryashyizweho umukono na M23 na SADC nyuma y'inama yabereye i Goma ejo ku wa Gatanu,uyu mutwe wavuze ko ingabo za SADC (SAMIDRC), zizagenda n’intwaro n'ibikoresho byazo, ariko ngo zizagumana intwaro za FARDC (Ingabo za Leta ya DRC) hamwe n'ibikoresho byazo.
Iyi nama yabaye nyuma y'uko SADC yemeje ko igiye gukura ingabo zayo mu Burasirazuba bwa DRC, aho zari zoherejwe mu Kuboza 2023 gufasha FARDC guhangana na M23.
Nk'uko BBC ibivuga, M23 yafashe Goma mu kwezi kwa Mutarama 2025, nyuma y’imirwano ikomeye.
Abasirikare bo mu bihugu byo muri Afurika y'Epfo, Malawi na Tanzania bari mu nkengero z’umujyi wa Goma, ndetse bamwe muri bo baguye mu bitero mu gihe M23 yafataga umujyi.
Mu nama yabaye, ingabo za SADC zemeje ko zizafasha mu gusana ikibuga cy'indege cya Goma, kugira ngo zishobore gusubira iwabo.
M23 yemeje ko izafasha ingabo za SADC mu ngendo ndetse no gusubukura ibikorwa by’indege ku kibuga cya Goma.
Imirwano yateje impinduka zikomeye ku buzima bw’abaturage, aho ibihumbi babuze ubuzima, abandi barahunga, ndetse benshi basigaye badafite aho kuba.
Ibihugu bya SADC, birimo Tanzania, Malawi na Afurika y'Epfo, byashyigikiye iyi gahunda, ariko ikibazo cy'ubufasha ku baturage basenyewe n’intambara n'ibibazo by’umutekano kirakomeje.
Nubwo iyi nama yemeza ko ingabo za SADC zizasubira iwabo, ikibazo gikomeye kigihari hagati ya DRC, M23, n'abafatanyabikorwa bayo, ibyo bigatuma ikibazo cy'amahoro mu karere kigikomeje kuba ingorabahizi.
Eng
RSS 
TANGA IGITECYEREZO