Ishyirahamwe ry'umupira w'amaguru muri Kenya (FKF) ryatangiye gukora iperereza ku munyezamu witwa Patrick Matasi nyuma yo gukekwaho kugurisha imikino binyuze ku bategura imikino y'amahirwe 'Betting'.
Mu itangazo ishyirahamwe ry'umupira w'amaguru muri Kenya ryashyize hanze ,ryavuze ko muri iri perereza riri gufatanya n'impuzamashyirahamwe y'umupira w'amaguru ku Isi, ndetse n'impuzamashyirahamwe y'umupira w'amaguru ku mugabane w'Afurika, CAF.
Ryavuze ko kandi ritazigera ryihanganira ibijyanye no kugena uko umukino urangira ndetse ko biyimeje kurinda icyizere cy'amarushanwa yabo.
Patrick Matasi wahoze akinira ikipe y'igihugu ya Kenya ari gukorwaho iperereza nyuma y'uko hari amashusho yagiye hanze bivugwa ko ari aye ari mu modoka ari kumwe n'undi muntu ari kugurisha imikino.
Muri aya mashusho uwo muntu yagiraga ati: "Watwizeza ibitego bibiri mu gice cya mbere? Nta kindi dukeneye… Niba umukino ugiye mu minota 20 utarinjizwa, umukino uba ufunze. Ariko niba winjijwe hakiri kare mbere yuko umukino ushyuha, uba uwufunguye".
Uyu munyezamu we amusubiza agira ati: "Yego. Uzi icyo nzakora? Ibi byose ariko bizacamo bigendanye n’icyo nzaba navuganye na ba myugariro banjye".
Patrick Matasi yakiniye amakipe atandukanye muri Kenya arimo Tusker FC, AFC Leopards, Saint Georges FC yo muri Ethiopia na Kenya Police FC ari nayo aherukamo, gusa ikaba yaramurekuye ku mpamvu zitazwi.
Umukino aheruka gukinira ikipe y'igihugu ya Kenya ni uwo yatsinzwemo na Cameroon ibitego 4-1 mu mwaka ushize gusa igitego cya nyuma yagitsinzwe mu buryo budasabonatse ari naho benshi batangiye kumukeka.
Eng
RSS 
TANGA IGITECYEREZO