Perezida w'ishyirahamwe ry'umupira w'amaguru muri Cameroon (Fecafoot), Samuel Eto'o wari warafatiwe ibihano n'Impuzamashyirahamwe y'umupira w'amaguru ku Isi, FIFA byo kumara amezi atandatu atareba imikino y'ikipe y'igihugu yabirangije.
Muri Nzeri umwaka ushize nibwo uyu munyabigwi w'umupira w'amaguru uyobora Fecafoot kuva muri 2021 yari yarafatiwe ibihano byo kuba atemerewe kujya kuri Stade kureba imikino y'ikipe y'igihugu ya Cameroon haba mu bagabo ndetse no mu bagore mu byiciro byose mu gihe kingana n'amezi atandatu.
FIFA yasobanuye ko impamvu yamufatiye ibihano ari ukubera ibirego bibiri bijyanye n'umukino wa 1/8 cy’igikombe cy'Isi cy’abagore bari munsi y'imyaka 20 wahuje ikipe y'igihugu ya Cameroon na Brazil muri Nzeri umwaka ushize.
Nta bisobanuro birambuye ku miterere y'ibyabaye byatanzwe, ariko itangazo ryatanzwe na komite ishinzwe imyitwarire muri FIFA ryavugaga ko Eto'o yahamwe n'icyaha cyo kurenga ku myitwarire no kurenga ku mahame ya FIFA.
Kuri ubu ibi bihano Samuel Eto'o yabirangije ndetse byitezwe ko kuwa Kabiri azareba umukino ikipe y'igihugu ya Cameroon izakiramo Libya mu itsinda D mu gushaka itike y'igikombe cy'Isi cya 2026 kizabera muri Mexico, Canada na Leta zunze ubumwe z'Amerika.
Kugeza ubu muri iri tsinda Cameroon iri ku mwanya wa 2 n'amanota 9 aho irushwa inota rimwe na Cape Verde ya mbere.
Kuri ubu Samuel Eto'o yemerewe kureba imikino y'ikipe y'igihugu ya Cameroon
Eng
RSS 
TANGA IGITECYEREZO