Ikipe ikina muri shampiyona y'icyiciro cya mbere muri Libya, Al Ahli Tripoli ikinamo Manzi Thierry na Bizimana Djihad, yirukanye umutoza ukomoka mu Bufaransa wamenyekanye cyane ubwo yatozaga ikipe ya Rayon Sports, Didier Gomez Da Rosa.
Ubuyobozi bw'iyi kipe bwafashe uyu mwanzuro kuri uyu wa Kabiri nyuma y'uko bwari bumaze iminsi butishimiye uburyo ikipe ikinamo nubwo yatsindaga.
Al Ahli Tripoli iheruka gusinyisha kapiteni w'Amavubi, Bizimana Djihad aho yagiye asanga Manzi Thierry, yirukanye Didier Gomez mu gihe iri ku mwanya wa mbere mu gace kayo n'amanota 33 mu mikino 13 imaze gukinwa.
Uyu mutoza yirukanywe n'iyi kipe nyuma yuko yari yarayigezemo mu kwezi kwa 10 mu mwaka ushize amaze gutandukana n'ikipe y'igihugu ya Botswana.
Didier Gomez ntabwo azabigirana mu matwi y'abakunzi ba ruhago by'umwihariko aba Rayon Sports kuko yatoje mu Rwanda hagati ya 2013 na 2014, ayifasha kwegukana Shampiyona ya 2012/13 nyuma y’imyaka umunani yari imaze itayitwara.
Uyu mutoza yatoje amakipe atandukanye ku Mugabane wa Afurika arimo Simba SC, Coton Sports, Ethiopian Coffee, Horoya AC n’andi menshi. Yanatoje ikipe y'igihugu ya Mauritanie mbere yo kwerekeza mu ya Botswana mu mwaka ushize wa 2023.
Didier Gomez yirukanywe na Al Ahli Tripoli
Eng
RSS 
TANGA IGITECYEREZO