Umuhanzikazi Marianne Faithful yitabye Imana

Ni inkuru y’incamugongo yamenyekanye mu rukerera rwo kuri uyu wa Gatanu tariki 31 Mutarama 2025, ariko umuvugizi wemewe wa Marianne Faithful yemeje ko uyu muhanzikazi yitabye Imana ku wa 30 Mutarama.

Marianne wavukiye i Hampstead mu Kuboza 1946, yamenyekanye cyane mu ndirimbo ze zakunzwe nka 'As Tears Go By,' ndetse na filime zirimo iyitwa 'The Girl On A Motorcycle' n'izindi.

Ikindi cyatumye amenyekana cyane, ni uko yigeze kuvugwa mu rukundo na Mick Jagger uri mu bashinze itsinda rya Rolling Stones mu myaka ya za 1960 ryamamaye cyane mu ndirimo nka 'Wild Horses' na 'You Can't Always Get What You Want.'

Mu butumwa bwe nyuma yo kumenya inkuru y'urupfu rw'uwigeze kuba umukunzi we, Jagger yagize ati: "Faithful yari inshuti nziza, umuhanzi mwiza, ndetse n'umukinnyi wa filime ukomeye. Byambabaje cyane."

Nyuma y'igihe yarabaswe n'ibiyobyabwenge, Marianne Faithfull yongeye kubura impano ye, arakundwa cyane mu myaka ya za 1970 ubwo yagarukanaga album yise 'Broken English.'

Umuvugizi we atangaza iby'urupfu rwe yaize ati: "Marianne yitahiye mu mahoro, ubwo yari i Londres hamwe n'umuryango we wuje urukundo. Azakumburwa cyane."

Uyu muhanzikazi yagiye yumvikanaho kugira ibibazo byinshi by'ubuzima birimo kanseri y'ibere, ndetse n'indwara yitwa 'emphysema' yatewe no kunywa itabi cyane.

Mu 2020, yanduye Covid-19 maze amara iminsi 22 mu bitaro. Icyo gihe abaganga bari bari kumwitaho bari batangaje ko batiteze ko yarokoka ariko nyuma aza gukira ndetse nyuma y'umwaka ashyira hanze album ye ya 21 yise 'She Walks in Beauty.'

Mu bihembo yahawe, harimo icya 'World Lifetime Achievement Award' yegukanye mu bihembo bya Women's World Awards mu 2009 n'ibindi binyuranye.

Marianne Faithfull yakoze ubukwe ndetse akora gatanya inshuro eshatu. Mu bagabo bashakanye, harimo umuhanzi John Dunbar bashyingiranwe mu 1965, umunyamuziki Ben Brierly bashyingiranwe mu 1979, ndetse n'umukinnyi wa filime Giorgio Della Terza barushinganye mu 1988. Asize umuhungu umwe witwa Nicholas Dunbar.

Umuhanzikazi Marianne Faithful yitabye Imana ku myaka 78 y'amavuko.

">Reba hano imwe mu ndirimbo za Marianne Faithful