Ahabanza Imyidagaduro

Amatike 2.75% yari yaguzwe! Abafana bateye imijugujugu Tems wasubitse igitaramo i Kigali

Yanditswe na: Janvier Iyamuremye
Taliki:31/01/2025 13:39 0

Bisa n'aho Tems azakomeza kwibuka itariki ya 30 Mutarama 2025 nk'idasanzwe mu rugendo rwe rw'ubuzima, kuko kuva yakwandika ko asubitse igitaramo cye cya mbere i Kigali yakirijwe ibitutsi n'ibihumbi by'abafana bari bamutegereje, ariko kandi abanye-Congo bo bagaragaza ko bishimiye icyemezo yafashe cyo kudakandira mu Rwanda.

Uyu mukobwa yatunguranye, yandika ku rubuga rwa X agaragaza ko yamamaje igitaramo cyari kuzaba tariki 22 Werurwe 2025 muri BK Arena, ariko atazi neza ko hari "amakimbirane hagati y'u Rwanda na Repubulika Iharanira Demokarasi ya Congo."

Ubutumwa bwe yanditse burakocamye, kuko ibyo yavuze ntaho bihuriye n'ukuri, kuko intambara iri kubera mu Burasirazuba bwa Congo ihuje umutwe wa M23 ndetse n'Ingabo z'iki gihugu, kandi uyu mutwe uherutse gutangaza ko wafashe Umujyi wa Goma mu buryo budasubirwaho, kandi ko bari kwitegura kujya gufata Umujyi wa Kinshasa.

Mu butumwa yagize ati “Mperutse kumenyekanisha igitaramo cyanjye mu Rwanda ntazi ko hari amakimbirane akomeje hagati y’u Rwanda na Congo. Ntabwo nigeze ngambirira kutita ku bibera mu Isi, kandi ndasaba imbabazi mbikuye ku mutima niba ibi byaje gutya. Ntabwo nari nzi ibiri kuba. Umutima wanjye uri kumwe n’abagizweho ingaruka. Amakimbirane ntabwo ari urwenya kandi ndizera rwose kandi nsengera amahoro muri iki gihe.”

Bwari ubwa mbere uyu mukobwa w'ikimero yari kuba ataramiye i Kigali. Ndetse, ubutumwa bwe bumaze kurebwa n'abantu barenga Miliyoni 1.8.

Amakuru y’ibanze agaragaza ko amatike 275 yari yamaze kugurwa muri iki gitaramo, ndetse hari gutegurwa uburyo abafana bazasubizwa amafaranga yabo, kuko iki gitaramo cyahagaritswe.

Mu busanzwe inyubako ya BK Arena yakira abantu ibihumbi 10. Ukoze imibare neza ubona ko ijanisha ry’abantu ryari ryaguze iki gitaramo ringana na 2.75%.

Amatike y’iki gitaramo yari yashyizwe ku isoko tariki 22 Mutarama 2025. Itike ya make yari amafaranga ibihumbi 15 Frw, hagakurikiraho itike y’ibihumbi 25Frw, ibihumbi 40Frw, ibihumbi 50Frw ndetse n’ibihumbi 70Frw.

Abafana cyane cyane abo muri Kigali bagaragaje ko batishimiye ibyakozwe na Tems, ni mu gihe abanye-Congo bashimye Tems ku bwo kwifatanya nabo. Ndetse, abarimo Tom Close bagaragaje ko biteguye gutegura igitaramo kikazahuza Abahanzi bo mu Rwanda gusa, n’ubundi kikaba ku itariki 22 Werurwe 2025, ari nabwo Tems yari gutaramira abanya-Kigali.

Tems akimara gutangaza ko yasubitse iki gitaramo, urubuga rwa www.Ticqet.rw rwariho amatike ye, rwahise rukuraho uburyo bwafashaga abantu kugura amatike.

Hari amakuru avuga ko Tems yafashe icyemezo cyo gusubika iki gitaramo atarabyemeranyaho n’ubuyobozi bwa BK Arena bwamufashaga kwamamaza.

Bruce Twahirwa utegura ibitaramo mu Rwanda, yagaragaje ko mu busanzwe umuziki ukwiye kugira uruhare mu guhuza abantu, kurusha uko ufata uruhande. Ati "Ntacyabuza Impala gucuranga."

Ukoresha izina rya 'Her Majesty Blance' yabwiye Tems ko mu busanzwe u Rwanda rwakira abakozi b'Imana, abahanzi b'indirimbo zo kuramya no guhimbaza Imana n'abandi. Ariko kandi iyo 'Umukozi wa Satani ahagaritse igiatramo, turapfukama tugashima Imana mu izina rya Yesu'.

Uwase Constantin we yabwiye Tems ati 'Injiji gusa'. Iradukunda Liliane we yabwiye Tems ko byamusabye kubaza umuvandimwe we kugirango amenye uwo ariwe, kuko atari amuzi.

Ukoresha izina rya Life Forcer Always, we yabwiye Tems gutangira kumenyekanisha igitaramo cye mu Majyaruguru ya Uganda 'kuko ho hari amahoro'.

Omo Kogi we yashinje abashinzwe kureberera inyungu za Tems kutamenya amakuru y'ibanze y'ibibera muri Afurika 'mu rwego rwo kwirinda ibi byiza'.

Bonny Ntumba yabwiye Tems ko ari umunye-Congo, kandi ko yishimiye icyemezo yafashe cyo kudataramira mu Rwanda, ati "Ni icyemezo cyiza cy'uko uri umuntu mwiza."

I miss when music used to unite nations not take sides!! in kinyarwanda we say ntamvura yabuza Impala gucuranga ! Let the music play https://t.co/huIjiSv6H5
— Bruceintore (@BruceIntore) January 30, 2025

Tems yatangaje ko yasubitse igitaramo cye i Kigali, yitwaza iby’intambara iri kubera muri Congo

Tems ari mu bahanzi begukanye Grammy Awards, kuko yayitwaye tariki 5 Gashyantare 2023 mu cyiciro cya ‘Best Melodic Rap Performance kubera indirimbo ‘Wait for u’ yakoranye na Future na Drake

Mu bijyanye n’amafaranga, Tems abarizwa umutungo uri hagati ya $1 Miliyoni na $2 Miliyoni

Tems yasubitse iki gitaramo, mu gihe azataramira muri Afurima y’Epfo tariki 20 Werurwe 2025- Ibi bitaramo byose bigamije kumenyekanisha Album yise ‘Born in the Wirld’ yasohotse tariki 7 Kamena 2024