Umunyezamu wa Rayon Sports yasabye imbabazi ku makosa aheruka gukora akamuviramo ikarita y'umutuku

Ku wa Kabiri w'iki Cyumweru nibwo ikipe ya Rayon Sports yakinaga na Police FC mu mukino wa 1)2 w'igikombe cy'Intwali. Ni umukino warangiye iyi kipe yambara Ubururu n'Umweru itsinzwe kuri penaliti 3-1 ariko yasoje n'umukino ifite abakinnyi 10 mu kibuga.

Khadime Ndiaye yari yabonye ikarita y'umutuku ku munota wa 77 aho Byiringiro Lague yari amukiniye nabi,maze nawe agahaguruka yiruka akajya kumukanda umutwe.

Nyuma y'ibi uyu munyezamu aganira na Rayon Sports TV yavuze uko byagenze aho yagize ati "Nafashe umupira nyuma yaho uriya mukinnyi araza ankubita mu maso mpita ndakara niyo mpamvu nanjye nahise mbigenza kuriya ariko ntabwo narimfite ziriya ntego, ntabwo aricyo naringambiriye kubera ko ikipe muri biriya bihe yari inkeneye ngo nyifashe".

Yavuze ko asaba imbabazi ndetse ko atazongera gukora ibintu nka biriya.Ati " Nzi ko ndi umuntu utanga ibyishimo ariko ndasaba imbabazi ku bayobozi ba Rayon Sports n'abatoza. Ndi hano kubera Rayon Sports,nzakora ibishoboka byose ngo sinongere gukora ubugoryi nka buriya".

Khadime Ndiaye yavuze ko buri muntu wese yakora amakosa ,anasaba imbabazi abafana ba Rayon Sports byumwihariko.

Ati" Ndi hano kugira ngo nkore, ntabwo ndi hano kugira ngo nishimishe ariko buri wese akora amakosa,ndi umuntu ariko ntabwo nigeze nkora biriya mbingambiriye,narindakaye ariko kubera ko muri biriya bihe ikipe yari inkeneye.

Ntabwo nagombaga gukora biriya. Hari abatarabyumvise neza niyo mpamvu nasabye imbabazi nk'ubu nkaba nongera kuzisaba abafana ba Rayon Sports,uriya ntabwo ari we musanzwe muzi. Ndabizi ko banshyigikira kandi ndi hano ku bwabo".

Yavuze ko mu mikino yo kwishyura ya shampiyona bazakora ibiruta ibyo mu mikino ibanza ndetse ko bahari kugira ngo batwara buri kimwe cyose.

Khadime Ndiaye asabwe kugira ubutumwa agenera abafana ba Rayon Sports yongeye kubasaba imbabazi agira ati " Ndasaba imbabazi abakunzi, abayobozi ba Rayon Sports n’ikipe yanjye muri rusange. Nakoze ikosa ku mukino wa Police. Nzi ko banshyigikira cyane. Nanjye ngomba gukora ibyiza kurushaho.”

Kugeza ubu Rayon Sports iri kwitegura imikino yo kwishyura ya shampiyona nyuma y'uko yari yasoje ibanza iri ku mwanya wa mbere ku rutonde rwa shampiyona n'amanota 36.Izatangira imikino yo kwishyura ikina na Musanze FC.

Khadime Ndiaye yasabye imbabazi ku makosa yakoze

Khadime Ndiaye yavuze ko  ibyo yakoze atari yabigambiriye