Perezida Kagame na Madamu basuye aharuhukiye Mustafa Kemal Atatürk ufatwa nk'uwashinze Turukiya

Kuva kuwa Gatatu, tariki ya 22 Mutarama 2025, Perezida Paul Kagame na Madamu Jeannette Kagame bari muri Türukiya, ndetse kuri uyu wa Kane basuye imva iruhukiyemo Mustafa Kemal Atatürk, wabaye Perezida wa mbere w’iki gihugu ndetse ufatwa nk’uwagishinze, mu gihe bakomeje kugirira uruzinduko rw’akazi rw’iminsi ibiri muri iki gihugu.

Uru rwibutso rwa Anıtkabir Memorial Tomb rufite amateka ahambaye ku Banya-Turukiya kuko ni rwo rushyinguwemo Mustafa Kemal Atatürk, wabaye Perezida wa mbere wa Türkiye akaba n’uwashinze iki gihugu.

Perezida Kagame na Madamu Jeannette Kagame bashyize indabo ku mva ashyinguyemo ndetse baranamwunamira nk’ikimenyetso cyo kumuha icyubahiro.

Mustafa Kemal Atatürk yabonye izuba mu 1881, atabaruka mu 1938. Afatwa nk’umwe mu basirikare b’ibihe byose bagize uruhare mu rugendo rwagejeje Türkiye ku kubona ubwigenge.

Yabaye Perezida wa mbere wa Türkiye kuva mu 1923 kugeza yitabye Imana mu 1938, aho yibukirwa ku mavugurura yahinduye iki gihugu, kigashobora kwiteza imbere.

Mu ruzinduko Perezida Kagame na Madamu Jeannette Kagame bari kugirira muri Türkiye, biteganyijwe ko kuri uyu munsi Umukuru w’Igihugu agirana ibiganiro byihariye na mugenzi Recep Tayyip Erdoğan.

Ibiganiro by’abakuru b’ibihugu birakurikirwa n’ibyo bagirana bari kumwe n’itsinda ry’intumwa zabo mbere yo gutangariza abanyamakuru ibikubiye mu biganiro bagiranye.

Biteganyijwe ko Perezida Kagame na Madamu Jeannette Kagame bakirwa mu cyubahiro ku meza na Perezida Recep Tayyip Erdoğan.

Umubano w’u Rwanda na Turukiya wateye imbere byihuse kuva ubwo u Rwanda rwafunguraga Ambasade i Ankara mu 2013. Mu mwaka wakurikiyeho, iki gihugu na cyo cyafunguye Ambasade i Kigali.

Mu rwego rwo gushimangira uyu mubano, Minisitiri w’Ububanyi n’Amahanga wa Turukiya, Mevlüt Çavuşoğlu, yasuye u Rwanda muri Gicurasi 2016, hasinywa amasezerano atatu y’ubufatanye bwa Minisiteri z’Ububanyi n’Amahanga, mu burezi no korohereza abinjira muri ibi bihugu.

Guverinoma y’u Rwanda n’iya Turukiya zifitanye amasezerano y’ubufatanye 18, arimo ayo guteza imbere umuco, ubumenyi, ikoranabuhanga no guhanga udushya.

Amwe muri aya masezerano yashyizweho umukono muri Mutarama 2023, ubwo Minisitiri Mevlüt Çavuşoğlu yagiriraga uruzinduko mu Rwanda.

Ubucuruzi hagati y’u Rwanda na Turukiya bwari ku gaciro ka miliyoni 21 z’amadolari ya Amerika mu 2018, kagera kuri miliyoni 78,4 z’amadolari mu 2020.

Perezida Kagame na Madamu Jeannette Kagame basuye Urwibutso rwa Anitkabir ruruhukiyemo uwabaye Perezida wa mbere wa Turukiya

Bashyize indabo ku mva ashyinguyemo baranamwunamira

Mustafa Kemal afatwa nk'uwashinze Igihugu cya Turukiya