Napoli iri hafi kwegukana Alejandro Garnacho

Nk’uko byatangajwe na Corriere dello Sport yo mu Butaliyani, Garnacho yagiranye ikiganiro kuri telefone n’umutoza mushya wa Napoli, Antonio Conte, kigaruka ku mugambi wo kumwerekeza muri Serie A.

Napoli iri gutegura kugura Garnacho ku kayabo ka miliyoni 60 z’amayero (60,000,000 €). Amakuru ahari avuga ko umuyobozi ushinzwe imikino muri Napoli, Giovanni Manna, azaguhura n’abayobozi ba Manchester United mu masaha ari imbere kugira ngo bungurane ibitekerezo ku masezerano y’uyu mukinnyi.

Amakuru aherutse gutangazwa na The Sun yashimangiye ko ikipe ya Manchester United yiteguye kwakira miliyoni 60.000,000 Z'amayero kuri uyu mukinnyi.

Garnacho, ufite amasezerano ya Manchester United azarangira mu mpeshyi ya 2028, amaze kugaragaza impano ikomeye. Kuva uyu mwaka w’imikino watangira, amaze gukina imikino 32 mu marushanwa yose, atsinda ibitego 8 ndetse atanga imipira 6 yavuyemo ibitego.

Umutoza wa Napoli Antonio Conte asanga Garnacho ari umukinnyi ushobora kuzana umuvuduko n’imbaraga mu ikipe, by’umwihariko mu kwiyubaka nyuma yo gutakaza bamwe mu bakinnyi b’ingenzi. 

Garnacho azwiho kuba afite impano yo gutera umupira asatira izamu, gukina neza ku mpande zombi, ndetse no gutanga umusaruro mu buryo butandukanye.

Nk’uko Transfermarkt ibigaragaza, agaciro k’uyu mukinnyi kari kuri miliyoni 50 z’amayero (50,000,000 €), ariko Napoli yiteguye gutanga menshi kugira ngo imwegukane. 

Iki gikorwa kirerekana uburyo Napoli yiteguye kurwana ishyaka muri Serie A no mu marushanwa yo ku rwego mpuzamahanga.

Mu gihe Napoli yamubona, Garnacho azaba yinjiye mu mateka nk’umwe mu bakinnyi bakiri bato baguzwe amafaranga menshi mu mateka ya Serie A. Abafana ba Napoli biteze ko azafasha ikipe yabo gusigasira umwanya wayo mu makipe akomeye mu Burayi.

Ikipe ya Napoli iri mu nzira zo kwegukana umunya Argentina Alejandro Garnacho