Sena y’u Rwanda yemeje Dr. Kadozi na Muhongerwa ku nshingano nshya baherutse guhabwa

Ni icyemezo cyafashwe nyuma y’isuzuma ryakozwe na za komisiyo kuri dosiye zabo bikagaragara ko bafite ubumenyi n’ubushobozi bizabafasha kuzuza neza inshingano bahawe.

Perezida Paul Kagame yagize Dr. Edward Kadozi, Umuyobozi Mukuru w’Inama Nkuru y’Amashuri Makuru (HEC) asimbuye Dr Rose Mukankomeje wari kuri uwo mwanya kuva mu 2019.

Ni impinduka zikubiye mu itangazo Ibiro bya Minisitiri w’Intebe byashyize hanze ku wa 17 Mutarama 2025.

Dr Kadozi wahawe umwanya afite ubunararibonye bw’imyaka 14 mu bijyanye no kubakira abantu ubushobozi mu bijyanye n’ubucuruzi, ubukungu, ikoreshwa ry’ingufu, kubungabunga ibidukikije n’ibindi.

Anafite ubunararibonye bw’iyo myaka mu bijyanye no kwigisha n’ubushakashatsi yakoze mu mashuri makuru na za kaminuza n’ibindi bigo bikomeye by’ubushakashatsi.

Yari umwarimu muri Kaminuza y’u Rwanda no muri Kaminuza Yigenga ya Kigali (ULK), aho yigishaga abanyeshuri bo muri master’s ibijyanye n’ubukungu n’iterambere; imirimo yafatanyaga n’ibindi byo guhugura abantu mu nzego zitandukanye.

Yafashije abarenga 50 bari gukora ubushakashatsi mu byiciro bitandukanye bya kaminuza haba mu cya Kabiri, icya gatatu na PhD. Ni ubushakashatsi bwakorwaga n’abanyeshuri bo muri kaminuza zo mu Rwanda, u Burayi na Amerika.

Mu 2019 yakuye impanyabumenyi y’ikirenga, PhD muri Kaminuza ya Amsterdam mu Buholandi mu bijyanye n’ubukungu. Afite kandi master’s yakuye muri Tsinghua University yo mu Bushinwa, akagira n’indi mpamyabumenyi y’icyiciro cya Kabiri yakuye muri Kaminuza y’u Rwanda.

Ni mu gihe Urwego rushinzwe kugenzura iyubahirizwa ry’uburinganire n’ubwuzuzanye bw’abagore n’abagabo mu Iterambere ry’Igihugu rwahawe Agnes Muhongerwa nk’Umugenzuzi Wungirije Ushinzwe Kurwanya Akarengane n’Ihohoterwa bishingiye ku buringanire.

Sena y'u Rwanda yemeje abayobozi bashya baherutse guhabwa inshingano

Dr. Kadozi Edward yemejwe nk'Umuyobozi Mukuru wa HEC